Ym ioh bai sngi, ki nongtrei 100 sngi, la bun bnai, ong ki Rangbah Shnong Ribhoi

Shillong:Ka Synjuk Ki Rangbah Shnong Ri-Bhoi, mynhynnin ka sngi ki la kam ba ki nongtrei bylla 100 sngi ne NMGNREGS ha Ri-Bhoi, kim ioh bylla la bun bnai bad kumjuh ki bai tiar namar ba ka sorkar kam shym la pyllait pisa shuh.

U general secretary ka Synjuk u bah PB Sylliang, u la ong ba ki nongtrei bylla 100 sngi kila shah iehbein ha ka sorkar namar ba kim ioh thikna shuh ia ka bai bylla bad la don lei ki nongpyniaid kum ki Chairman ki VEC ki hap ban buh bynda ia ki jaka puta jongki ban siew ia ki bai thied tiar na ki dukan namar ba kim pat lah siew ia kiba rim ruh namar ka jingbym pyllait pisa ka sorkar.

U la ong ba mynshwa tang 15 sngi la ioh beit ia ka pisa hynrei mynta la bun bnai khlem ioh pisa satia. “Kumba ka long mynta wat ia ka bai bylla ym ioh thikna shuh, bad don ki chairman jong ki VEC ki hap ban buh bynda ia ki jaka jongki ban siew ia ka bai tiar ban siew ia ka jingtrei bad wat ki dukan tiar kim ai shuh ban thied namar ba kim pat ioh pisa”, la ong u general secretary ka synjuk rangbah shnong Ri bhoi.

Ha kajuh ka por, ula iathuh ba ka la iakren bad u myntri ka tnad social welfare u bah Paul Lyngdoh ban kyntiew kyrdan noh ia ki aganwadi centre sha ki centre ha ki shnong bapher bapher bad ban plie ia ka centre thymmai ha ki shnong kiba hap ha Ri-Bhoi.