Shillong:Ki Pulit ka East Khasi Hills, ki la kem ïa uwei u Nongïalam ka seng Hynñiewtrep National Youth Front (HNYF) halor ka jingkynnoh ba u donkti ban pynïaid ïa ki trok kit mar ba kit palat pud na Jingkieng Damsite da kaba lum pisa haduh T. 1500 kawei ka trok.
Une u Nongïalam ka HNYF ba la ngat ha along ki Pulit u dei u Bah Bless Dkhar, President ka Hynñiewtrep National Youth Front (HNYF) ka East Khasi Hills District.
Haba pynthikna ïa kane ka jingjia, u Superintendent of Police (City) ka East Khasi Hills u Bah Vivek Syiem ula ïathuh, “Ïa u Bless Dkhar la kem ha ka sngi Nyngkong da ki Pulit ka Laitumkhrah Police Station. La kem ïa une u nongïalam Sengbhalang na ka thaiñ Pohkseh”.
Katkum ka khubor, ki Pulit ka Laitumkhrah Police Station kila register da ka Suo-Moto case pyrshah ïa u Bless Dkhar halor ka khubor bad ki video ba la saphriang ha ki Social Media, kiba pynshisha ïa ka jinglum pisa une u Nongïalam Sengbhalang na ki trok kit mar, ba un ïarap pyllait ba kin ïaid na ka Jingkieng Damsite.
Ha kine ki khubor bad video, la ïohsngew ruh ïa ka jingïakren hapdeng u Bless Dkhar bad uwei u briew ba kam ïalade kum u nongkhaïi, ba ïapynbeit halor ka jingpynïaid ïa ki trok kit mar na Jingkieng Damsite.
U Bah Bless Dkhar da kaba shai, ula pan haduh T.1500 na kawei ka trok ba un pyllait ba kin ïaid na Jingkieng Damsite kampher la ka dei ka trok kit khaw FCI ne kiwei kiwei ki mar.
Lah ban kdew hangne ba ka Ïingkashari Meghalaya High Court ka la bthah ïa ka Sorkar Jylla ba ka dei ban pyrkhing ïa ka jingïaid jong ki trok kit mar na jingkieng Damsite namar ba ka jingkieng kala rim bad kam lah kyrshan shuh ïa ka jingkit kaba khia.
Katkum ka hukum, ka Ïingkashari kala buh ba tang ki kali kiba khia hapoh ka 10 ton ki lah ban ïaid na kane ka jingkieng.
baroh shi lynter ki don ki nong khrong pisa na ki trok balei phim Kem ia kiwei ruh ki nonglum pisa kiba Don naduh Byrni haduh Malidor