Yn nym iatreilang shuh ka UDP bad ka NPP ha ka elekshon MP

Shillong:Ka United Democratic Party (UDP) kam ym iatreilang shuh bad ka National People Party (NPP) ha kane ka MP elekshon ban wan, kumba la iatreilang ha u snem 2019.

Haba kren mynta ka sngi, u General Secretary ka UDP u Dr. Jemino Mawthoh u la ong ba kam don shuh ka jingiakren ban iatreilang bad ka NPP bad yn iaid la kajong ha ka MP elekshon hynrei, ka UDP kan sa iatreilang bad ka HSPDP hapoh ka lama ka Regional Democratic Alliance (RDA) bad u la khot lang ia kiwei ki seng riewlum ban iatreilang lang mlon ha ka kyrteng ka jaitbynriew ban iakhun ia ki mat ba kyllum.
U la ong ba wat bad ka Voice of the People Party (VPP), kam don jingeh ban iatreilang na bynta ki mat ki jura jong ka jaitbynriew, khnang ban ym iapait kum ka jaitbynriew.

“Kam don kano kano ka jingiakren ban iatreilang bad ka NPP kumba leh ha u snem 2019 bad mynta kin iaid la kajong, lait noh bad ka HSPDP, ka UDP kan iatreilang ha ka MP elekshon”, la ong u Dr. Jemino.
Ka UDP bad ka HSPDP ka don ha ka lama ka Regional Democratic Alliance (RDA) bad la wer lang ia kiwei ki seng ruh kiba kwah ban don ka jingiatylli khnang ban sei ia ka bor jong ki riewlum kaba tylli mlon.
“Wat ka Voice of the People Party (VPP) ruh kam don jingeh ban iatreilang na bynta ka jaitbynriew. Ka UDP ka kwah ba ka jingmut jong ki paidbah kan wan ha kajuh khamtam ha kaba iadei bad ki mat ba kyllum jong ka jaitbynriew”, la bynrap u Dr. Jemino.

Halor ka jingmih ka VPP, u Dr. Jemino u la ong ba ym pat lah ban ong ba kan ktah ne em namar ba ka shong ha u paidbah ban ai ia ka rai hynrei ka long kaba donkam ban don ka jingiatylli ha ka jaitbynriew ban iakhun ia ki jingeh jong ka jylla bad lada saphred kumne, kan buh jingeh ia ki seng riewlum.
Ha kaba iadei bad ki kyrtong MP, la bun kiba mih bad ka party kan sa leh ia ka jingbishar, lum jingtip na ki konstitwensi bad ka district bad hadien kata, yn sa pynbna ia u kyrtong. Ngi kyrmen ba kan ioh ia u kyrtong uba bit dor ban poi sha ka jingjop.