Yn long CEM U Conrad Sangma

Shillong, 16 Risaw:
Ki 10ngut ki MDC ka NPP, ryngkat ki kynhun ba ia snohkti lang bad ka na ka bynta ban thaw ka ia Executive Committtee ba thymmai ha GHADC ba kynthup ia 3 ngut ki MDC ka GNC, 1 ka BJP bad 3 ngut ki MDC shimet.
Ha ka jingialang ba kyrkieh jong ki kaba la long mynta ka miet ki la shim ia ka rai ban jied ia ka kyrteng u Working President ka NPP u Conrad Sangma ban long kum u MDC ba shu sieh ha GHADC bad ruh ka la rai ba ka kynhun jong ka kan jied ia u Conrad kum u Chief Executive Member ka GHADC.
Ha ka jingiakren bad u nongthohkhubor ki nongialam ka NPP ki la ong ba ki la jied ruh ba u Chairman jong ka katei ka kynhun synshar ha GHADC ia u Boston Marak u MDC ka NPP na Nogorpara. Katei ka kynhun ka ba ialam khmat da ka seng NPP kaba kynthup ia ka seng GNC, BJP bad ki MDC shimet ka dei kaba la ai kyrteng kum ka Garo Hills Progressive Alliance.Katkum ka jingiathuh kitei ki nongialam ka NPP ki la ong ba ha ka 19 tarik mynta u bnai kan don ka dorbar kyrpang ka GHADC ha kaba yn jied shuwa ia u Chairman jong ka bad ka la pynthikna ba u kyrtong Chairman na katei ka kynhun jong ka un dei u Boston Marak bad ha ka 21 tarik mynta u bnai pat kan don ka dorbar kyrpang ban jied ia u CEM bad ka la pynbna ba u kyrtong CEM ka kynhun ka NPP un dei u Conrad Sangma u khun jong u Purno A Sangma uba katei ka kynhun ka la jied ia u ban long kum u MDC shu sieh.
Hynrei ha kawei pat ka khubor la ong ba ka seng Congress, wat la ka la duh ka jingshaniah na ki paidbah; hynrei la ong ba mynta ka dang pyrshang ban tyllai ban ioh thaw EC hapoh GHADCC, ha kaba ia kren bad u President ka Youth Congress u Richard Mrong Marak u la ong ba mynta ka seng Congress ka dang pyrshang ban ia kren bad ki MDC shimet bad kumjuh ruh bad ka seng NCP, hynrei u la ai ksai ba ka Congress ka lah ban thaw ia ka EC ha GHADC watla ym dei mynta ha kaba sdang ruh hynrei kan pynthikna ba kan pynkhyllem ia kane ka EC ba mynta ka ban ialam da ka seng NPP.
Lah ban kdew ba ha ka elekshon GHADC ka seng NPP ka dei ka seng kaba la ioh bun tam ki MDC bad katei ka seng ka la don lypa ki kynhun ia treilang bad ba kynthup ia ka seng GNC kaba don 3 ngut ki MDC, ka BJP 1 bad ka la pynthikna ruh ba na 7 ngut ki MDC shimet ka la bat lypa ha kti 3 ngut na ki kaba la pynthikna ba kan thaw ia ka Ec kaba thymmai. La thikna ruh ba ka jingthrang katei ka seng ban pynlong CEM da u Conrad Sangma ka lah ban urlong namarba watla ka hap ban ioh ia ka jingmynjur na ka sorkar jylla ka ban mynjur lyngba ka tnad DCA pynban katei ka kynhun ka dei kaba ia jan tam bad ka seng BJP ha kaba u Purno A Sangma MP ka Tura ruh u dei hapoh katei ka kynhun bad katei ka seng ka la sngew tikna ba u Lat un mynjur beit ia ka kyrteng u Conrad.