DA PYNSHONGNIA

P.B.S

[ba bteng] “Phin leh kumta kpa?” kren lyngngoh ka menkmie
“Hooid, kumta kein, balei phim sngew dei?” buh jingkylli u menkpa
“Em, nga shu kylli kein. Ka shong ha phi u rangbah kein” jubab ka menkmie
“To nga la leit ba lah slem bad ngan beh kat ba lah ban wan kloi sha iing ba lah khriat. Ngi ba lah ring sti kumne te ym lah shah shuh ia ka jingkhriat” ong u menkpa bad u mih artat
“To kpa to nang bha kamai” kren kit bok ka tymmen jong u.

Haba u bah Bok u la poi ha kata ka jaka iakut bad u paralok u la leit peit shwa ia kata ka kali. Haba u paralok jong u u la pyni u iohi ba ka kali ka dang i biang bha. Ka dei ka Alto rong maroon bad ka dang dei ka ML05 N
“Te ka dang i thymmai bha du kane ka kali jong phi” ong u bah Bok
“Hooid ka dang bha bad ka dang tip top bha hi kein. Ka kali ba niah hi u trai ka pher namar nga sumar bha ia ka” ong u bah Living
“Te, katno phin kein ia nga?” kylli dor u bah Bok
“Kumto kumba nga lah ong ia phi haba phun tang shilak arphew hajar lah biang” kren pynthikna u bah Living.

“Ban dei ha kiwei ngan ai ngan phah beit shilak hynriewphew hajar” ban ktien biang u bah Living
“Khublei shibun ia ka jingsngew paralok jong phi” ong u bah Bok
“Kata phi mut ban thied noh da kawei pat kaba kham bha?” kylli u bah Bok
“Hooid, ki khun ki ong ban thied noh da kaba kham rem ban kham suk bad kham aram haba leit jingleit jngai” iathuh u bah Living
“Kata ruh ka dei, ka kali rem ka pher shibun na kiba tad” mynjur u bah Bok
“Bad kane phi lah long 2 tylli ki kali, dei?” bniah u bah Living
“Hooid, tangba ngan da peit ngan buh baroh ar ne ngan pyniaid noh kawei” iathuh hok u bah Bok
“Haba ka lah don bad phi ka shong ha phi la phi die kham rem ruh sa leh aiu” ai jingmut u bah Living
“Ka dei kaba phi ong” mynjur u bah Bok.

“Ale rung shapoh iing ngin ia dihsha shwa” wer u bah Living
“Hooid kein da dihsha ka kham syaid. Nga myntlang nga sngewtynnad eh ban dihsha bunsien bunsien namar ka pynsyaid” mynjur u bah Bok
Hadien ba ki la shongkai kumba 5 minit ei ei ka khun kynthei u bah Living ka la wanrah sha dud kaba ibang bha bad lai jait ki jingbam kynthup ia u kek. Haba la dep dihsha u bah Bok u la leit peit jingtrei noh bad u la kular ha u bah Living ba un wan shim noh ia ka kali ha shuwa ka 24 tarik December.

“Da phim pat ioh lad ruh sa ai shuwa shiteng ruh ym lei lei mo bah Bok” ong u bah Living
“Sngewtynnad ba phi ong kumta. To lada nga don ruh ngan ai full syndon mo” pynpaw u bah Bok
“To kam pher hynrei nga shu ong lypa jait ba dei u paralok” ong u bah Living
“To, khublei shibun” ong u bah Bok
U Bah Bok u la mih na iing u paralok ha ka por 1 baje nohphai sngi. U la leit peit jingtrei sha kawei pat ka shnong. U la poi haduh 9 baje mynmiet. Ka menkmie ka la sngewthuh lypa ia ka horn u menkpa bad ka la tiew sha noh namar u menkpa u ju dihsha beit man ba wan jingwan. Ka la dei ka rukom jong u
“Katta por balei kpa?” kylli ka lok ha ka sur kaba jem.

“Ki kam jong nga phi tip hi em. Kaba slem ruh kato kaba kloi ruh kato. Phi ong katta por haba dang 9 baje ruh” ong u menkpa bad u lock artat ia ka kali.
“Tang lah tlang te lah sngew thait ba khriat” ud khriat u menkpa
“Ka sha nga lah tiew lypa wat khuslai” ong ka menkmie bad ka klum bha ia la ka sweater syaid
“Biang palat khublei shibun” kren ieit u menkpa
“Ka dei shisha kaba ki ong ba ka por kam ju ap iano iano peit mynta sa ban kut une u snem. Ka shongnia kato ka jingong ba ka por ka long kaba kordor. Uba burom ia ka por u iohnong shibun hynrei ki bym khein kor te ka shah ktah. Sa tang katto katne sngi ki nongtrei la hap ban ai shuti Khristmas bad snem thymmai” ong u menkpa katba u dang dihsha.

“Kumba ju leh hap leh hi kumta te kpa. Kiwei ruh kumjuh hi” ong ka menkmie kaba dang dihsha lang bad u menkpa
“Tangba mynta te kham special” ong u menkpa khlem pynkut bha
“Special ia kaei kpa?” kylli bniah ka menkmie
“Phi lah klet seh haba lah iakren tang bad phi ruh” pynpaw u menkpa
“Ia kaei kumto? ” pyrshang kynmaw ka menkmie [yn dang bteng]