Hap pan jingbit shwa ban thang ne pynjot ïa ki drok, ong u Chairman CBIC

Shillong:U Chairman ka Central Board of Indirect Taxes & Customs (CBIC) u Sanjay Kumar Agarwal, ula ïathuh ba ka tnat ka donkam ban shim jingbit shwa na ka ïingbishar hashuwa ban pynjot pynpra lane ban thang ïa ki drok ba ïoh kurup.

Haba kren sha ki lad pathai khubor u Sanjay, u la ong ba ka tnat ka hap ïaid bun ki lynti katkum ki kyndon lane ka jingbthah ka ïingbishar hashuwa ban pynduh pyn dam lane ban thang ïa ki drok ba ïoh kurup.
“Ha kano kano ka por ba ïoh kurup drok, ka tnat kan pynkhreh ban pynduh pyndam lane ban thang ïa ki Drok ba ïoh kurup da ka ba shim jingbit na ka ïingbishar,” la ong u Sanjay.

Haba kylli halor ki Drok ba ïoh kurup hapoh Meghalaya, u Chairman ka CBIC ula ong, “Ïa ki jait drok ba ïoh kurup ha Meghalaya hap ban pynduh pyndam lane ban thang ïa ki Drok ha nongbah Shillong hadien ba ïoh jingbit naka ïingbishar”.

Ula ong ba ïa kino kino ki kam haba ïadei bad ka jingïoh kurup Drok, ka tnat ka ïatreilang bad ka ïingbishar na ka bynta ban leh ia ka ba donkam, la kadei ban pynduh pyndam lane ban thang ïa ki Drok lane ban pynshitom ïa kino nongkhaïi Drok.