Shillong:Ka Mawrusyiar Youth and Cultural Club (MYCC), kaba dei ka wei na ki sports club ki ba ju trei shitom bad kaba la kham paw ha ka jing pynlong ia ki jingialehkai bad ki prokram bapher bapher bad kaba la bat ruh ia ka kyrdan jong ka Best Outstanding Youth Club Award jong u snem 2021-22 jong ka District bad ruh jong ka State level, ka la pynkut noh ia ka jingialehkai inter dong jong ka shnong Mawru syiar.
Haka kane ka sngi la ia don bynta lang da u Bah Donboklang Marwein kum u kongsan, u bah Sunshine Lyngdoh Sordar Shnong Mawrusyiar kum u Symbud Kongsan. Ki riewrangbah jong ka shnong bad ki paidbah kiba la wan ban sakhilang ia kane ka jingialehkai. Haba ai jingkren u bah Donboklang, ula iaroh ia ki dkhot ka MYCC ba ki la lah shisha ban pynpoi ia ka Shnong bad khamtam na ka bynta ka Youth Club sha ki nam bad ki burom ha kine ki snem ba la dep. U la ai mysiem ia ka Sport Club Mawrusyiar da kaba kyntu ba kin dang pynkhian shuh shuh ia ki rukom treikam bad ban dang shim ia ki lad ki lynti ba ki players kin dang iashim bynta ha ba bun ki rynsan jingialehkai. U la pynpaw ruh ba lyngba ka jingpynbyrngia bad ka jingshim khia ki nongialam ban pynlong ia kum kine ki jingialehkai kan pynlait ia ki khun samla na ki kam ba sniew khamtam na u droks uba la jyllei bha hakane dong bad ka thain Nongstoin. U Bah Donboklang, u la pyn paw ruh ba ka jingialehkai ka dei ruh ka bynta jong ka koit ka khiah bad ba khambun na ki samla ki ju sngewtynnad ban ia shimbynta ha ki jingialehkai bapher bapher bad khatduh I la pynkyntu ia ki samla kiba dang don hapdeng ka jingpule ba ka jingsngewtynnad jongki ban ialehkai ban pynpaw ia ka sap ka phong kaba ki don ba kin kynmaw ba ka jingnang jingstad ruh kalong ka ba donkam bha bad ba ka dei ban iaid ryngkat ryngkat bad ki jingpule.
Ha ba ai jingkren u General Secreatry u Bah Lambor F Wanniang, u la pyntip ba ka Mawrusyiar Youth and Cultural Club kan sa kynjoh sha u Maw mer ba 50 snem ia kaba la dep ban plie ha ka 7tarik Kyllalyngkot, 2023 bad kan sa pynkut noh ia ka Golden Jubilee Celebration ha ka 6tarik Kyllalyngkot, 2024 lada ym don jingpynkylla shuh. U la pyntip ruh ba ki tnad treikam ki la don ha la ki jong ki jingpynkhreh bad ba ka MYCC kan pynmih ruh ia ka Souvenir, ka Video Documentary kaba kyrteng ka “THE VIBRANT 50 GOLDEN YEARS” kumta, ka pyntip ruh ba lada don kino kino ki Company, Bank, ki dukan, bad kiwei kiwei kiba kwah ban pynmih ia ki advertisement ki lah ban pyntip sha ki nongkitkam jong ka MYCC ne phone ha kine ki No 8575415233 / 9436307399.
Haba phai sha ka jingialehkai ka Dong Pdeng Shnong ka la lah ban rah ia ka nam jong ka jingjop da ka ba pynliem da 2-1 pyrshah ia ka dong Mawsiang. Ia ka nam Best Player la rah da u Wan shailang Marwein, Best Goalkeeper da u Bulness Nongrem bad u Top Scorer jong ka Tournament la rah da u Friding Wanniang.
Phi don ban ong eiei?