Diaw ka GBC, bym kynthup ktien Garo, ha ka khyrnit ba 8, ka riti synshar

Shillong:Ka Garo Baptist Convention (GBC), ka pynpaw ka jingsngew diaw, halor ka jing khlem shah kynthup ka ktien Garo lane A-chik hapoh ka thup jong ki 38 tylli ki ktien ban ïoh jingithuh ha ka khyrnit ba phra ka riti synshar ka Ri India, katkum ka jingpynbna ka tnat kam Pohïing ka sorkar pdeng.

Ka kyrwoh na ka GBC, ka kdew ba ka ktien bad ka thoh ka tar ha ka ktien Garo ka la kylla dur naduh ki por mynbarim bad ki don haduh 1.5 million ngut ki briew hapoh ka thaiñ shatei lammihngi (North East) bad ha 5 tylli ki district ka Meghalaya.

Ka kyrwoh, ka kdew ruh ba ki don haduh 33% ki nongshong shnong ka Meghalaya ki kren ïa ka ktien Garo ne Achik bad ka ktien ka la poi ruh sha ka kyrdan Doctoral haba ïadei bad ka pule puthi.
Ka kdew ruh ba kane ka jingdawa, ban ïoh jing ithuh ïa ka ktien Garo hapoh ka khyrnit ba phra ka riti synshar ka Ri India kadei kaba la slem.
Haba ïadei bad kane ka Garo Baptist Convention ka kyntu ïa ka sorkar India bad ïa ka sorkar Meghalaya ban shong bishar bniah ïa kane ka jingdawa ka ba dei ka jingmyntoi bad jingkyrkhu ïa ki nongshong shnong bad ka jylla baroh kawei.