Buh mawnongrim u MLA ban tei ia ka BIDC ba T.3 klur ha Jirang Block

Nongpoh:U Bah Sosthenes Sohtun, MLA Jirang, mynhynnin ka sngi u la leit ban buh ia u Mawnongrim, na bynta ban tei ia ka Block Integrated Development Complex, kaba don hajan ka Jirang Block, kaba la sdang ban pyntrei shaid shaid mynta bad kaba la ïoh ia ka jingpynmang pisa haduh T. 2.77 klur.

Haba plie ia katei ka Block Integrated Development Complex, nalor la jingdon u MLA Jirang, la sakhi ruh da ka jingdon u S.C Sadhu, Director ka Community & Rural Development jong ka sorkar jylla, u Bah M.B Tongper, SDO ka Patharkhmah Civil Sub-division, u Raja Brahma, Project Director ka DRDA lem bad shibun ki nongialam shnong ka thaiñ Ri Bhoi Sepngi.

Ki nongai jingkren ha katei ka sngi, ki la pynpaw ia ka jingkmen kaba khraw halor ka jingurlong katei ka Block Integrated Development Complex, namar lyngba katei ba kan sa pynsuk ia ki paidbah ha ka thaiñ Ri Bhoi Sepngi, ba kin leit donkam hapoh ka ophis u BDO bad ba kin sa ïoh shibun ki jingmyntoi sha ki shnong nongkyndong bad kiba dang sahdien ha katei ka thain.
Nalorkata, ki nongai jingkren ki la kyntu ïa ki nongialam shnong bad riew paidbah ba kin ai ka jingiatreilang bad ki briew ka Block, khnang ban wanrah jingmyntoi ha ki shnong ki thaw.