“Yn pynlait ka sorkar ia ka kali kit lyer oksijen ban die ia ki dohkha”

Shillong, 16 Risaw:
U Myntri Rangbah ka Jylla u Mukul Sangma hynne ka sngi u la plie ia ka 3rd  State Aqua-Fest  ba long ha  State Central Library, Shillong ha rynngkat ka jingdon lang ka Myntri kam Pynroi sor ka kong Ampareen Lyngdoh bad u Parliamentary Secretary u Sengnam Marak.
Haba kren ha kane ka sngi, u Mukul u la ong ba shen ka sorkar kan sa pynlait ia kali kit lyer oksijen (oxygenated van)  ban kit ia ki dohka ban die sha iew kiba dang im khnang ban pynkiew ia ka khaii pateng jong ki nongrep nongri dohkha bad ki samla kiba la nang la stad kiba kwah ban shim ia kane ka jait kam kum ka lad kamai jongki.
“Ia kane ka kali kit lyer oksijen yn aiti ha ki seng Self Help Group (SHG), Society ba kin pyniaid ia ki”, la ong u Myntri Rangbah.
U la ong ba ka jylla Meghalaya ka la thied dohkha nabar da ki ton bad ki ton namar ba kam lah ban pynmih nalade hynrei ka sorkar jylla ka la buh thong ba kan trei borbah ia kane ba ka jylla kan lah ban pynbiang hi ia ki jingdonkam dohkha.
”Ha u snem ban wan, ngi la buh thong ban shna sa kumba 8 hajar tylli ki pung dohkha bad ia kane yn leh lyngba ka jingiatreilang jong ka sorkar bad ki nongrep nongri dohkha”, la ong u Myntri Rangbah.
Ha kajuh ka por, u la ong ba ki briew ki dei ban sngewthuh ba ka jingkhwai dohkha kadei kawei na ki lad ban kamai ha ka jingim.
U la ong ba ka jingdawa dohkha ha ka jylla ka jur bha ha kaba wat ki dohkha ba shalan na shabar jylla ruh kim lah ban supplai ban pynbiang ia ka jingdawa.
U la kyntu ia ki nongtrei ka Aquaculture mission ban kin pynbun ia ki jaka ri dohkha bad ba kin pyniar shuh shuh ia kane ka prokram.
U la ong ba ka sorkar ka hap ban mang pisa T.400 klur tam ban  pynbiang katkum ka jingdonkam bad kan pyntikna ba ai ka jingkyrshan ha ka liang ka ri dohkha  bad ban ai jinghikai ia ki nongri dohkha.
Katba u Additional Chief Secretary u bah Hector Marwein, u la ong ba ka jingthmu ba kongsan  ba pynlong ia kane ka Aqua Fest ka long ban wanrah ia baroh ki nongri dohkha ha kawei ka rynsan ban ia phylliew jingmut .
Ha shwa ia kane la ioh ka jingkren na ka Director ka Fisheries ka IR Sangma, ka la ong ba T.88 klur kynthup ka bank loan bad ka subsidi la pynlut na bynta kane bad  palat 11000 tylli ki pung dohkha la shna bad  8400 tylli la thmu ban shna bad T.25 klur la pynlut na bynta ki symbai bad jingbam dohkha.
Ha kane ka sngi u Myntri Rangbah u la sam ia ka khusnam na  khatwei tylli ki district ka jylla Meghalaya kiba la trei bha ha kane ka kam ri dohkha.
La sam ruh ia ka khusnam T.10,000  nalor ka momento bad ka syrnod ba ioh ia ka State Award sha kito ki nongri dohkha.
Ha kane ka sngi la don lang da u Chairman ka NESFAS,u bah Phrang Roy, ki heh na ka tnad National Fisheries Development Board, Hyderabad  bad kiwei de.