Mynsaw 7 ngut ba kylla ka Scorpio, ha surokbah NH-6 ha Dulongnar

Nongpoh: Hynniew ngut ki briew na ka jylla Assam bad kiba la shong ha kawei ka kali Scorpio kaba don ia u number AS-01-DH-1716, ki la mynsaw bad kata ka dei hadien ba ka kali kaba ki shong, ka la kylla ha kawei ka jaka ba kham sniew jong ka surok NH-6 bad kaba hap ha khappud ka shnong Umdihar bad Dulongnar.

Katei ka jingjia, ka la jia hynnin ka sngi ha ka por 4:45 baje eiei janmiet, ha kaba katei ka Scorpio kaba la niah da u Samiulla Ali bad kaba mih na Shillong ban leit sha Guwahati, hynrei haba la poi ha katei ka jaka, katei ka Scorpio ka la kum leit tynrah ia u Divider ka NHAI, kaba la pynlong ia katei ka kali ba kan kylla bad kaba la wanrah ia ka jingmynsaw ia kiba shong hapoh katei ka kali.

Ia kitei ki 7 ngut kiba la mynsaw ha katei ka jingjia kylla kali, la pynkit noh mar mar ia ki sha ki jaka sumar, ha kaba na kitei ki 7 ngut ki don arngut kiba la kham mynsaw ia kaba la rah noh sha ki jaka sumar kiba kham biang, hynrei kitei kiwei pat ki shu mynsaw tang malu mala.