Pynhap pyrda ka Riwar College ia ka College Week

Shillong: Ka Riwar College Pynursla ka la rakhe ia ka College Week ba mynta u snem 2023, kaba la sdang ha ka 16tarik u Risaw 2023 bad la pynkut noh ia ka ha ka 21tarik u Risaw 2023. Ha kane ka sngi la pynkut noh ia kane ka College Week ryngkat ka jingdonlang u bah Prestone Tynsong, symbud myntri rangbah ka sorkar Meghalaya, uba long u kongsan, ha ryngkat ka jingsakhi lang jong ka SDO Pynursla Civil Sub – Division, ka Kong E. L. Warjri ryngkat lang u BDO ka Pynursla C&RD Block u Bah L. Kharmon, ki dkhot ka Governing Body, ki dkhot ka sponsoring body, ki Rangbahshnong/Secretary Shnong bad kiwei kiwei ki riew rangbah ka thain Riwar Mihngi.

Ha kane ka sngi u kongsan u la ai ka jingkren kyntu kynpham ia ki samla pule kane ka College ba kin iai long borabor kiba minot bad iaineh ha ka jingpule khnang ban poi sha ka thong. U bynrap shuhshuh ba dei ban phai khmat sha ka kam tourism namar ka dei ka lad ban ioh kam ioh jam. Ha kane ka jingkren, u Kongsan u pynpaw ruh ba u thrang ban kyntiew shuh shuh ia kane ka College lyngba ka jingpyniar ia kiwei kiwei pat ki shnat treikam, kata da ka plie ia ka Commerce bad Science stream hapoh kane ka college. Kumjuh ruh u pynpaw ia ka jingdonkam ban buh ia ki Hostel bad Coaching Centre ha kane ka College, khnang ban pynsuk ia ki samla pule kane ka thaiñ.