“Thombor ka Dorbar Shnong Laitumkhrah ia ka madan Iewrynghep”

Shillong:Ka madan Iewrynghep, Laitumkhrah ka la poi sha ïing kashari hadien ba ka kong Philamon Mawrie ka la kynnoh ba ka bor shnong ka la shu thombor ban pyndonkam jubor ia katei ka jaka jongka khlem kano kano ka jingbit na ka kum ka trai jaka.

Haba kren mynta ka sngi, ka kong Philamon ka la iathuh ba la bunsien ka la ai jingthoh sha ka bor shnong ba kam dei ban thombor ban pyndonkam ia katei ka jaka khlem ka jingbit na ka trai jaka hynrei kam shym la sngap. Ka la ai jingthoh sha ka Deputy Commissioner ruh ban pyrshah ia ka jingthmu ban pynlong ia ka tamasa ban kynmaw burom ia u bah Robert G Lyngdoh bam kwai ha duwar u Blei ha ka 23 bad 24 tarik mynta u bnai, kim shym la pan jingbit eiei na ka kum ka trai jaka.

Ka la iathuh ba kiwei ki ju wan ban pan jingbit na ka kum ka trai jaka hynrei ka la kynnoh, ba ka shnong pat ka la iaid lait bad ka la pynpaw ia ka jingsngewsih halor kane.
“Ngi sngewsih halor kane ka jingshah thombor ia ka jaka ha ka dorbar shnong khlem pan jingbit eiei”, la ong ka kong Philemon.
Na ka liang u nongiasaid ain u bah VG Kynta u la ong ba ka madan Iewrynghep ka dei jong u Rev. Mon Lyngdoh bad ka kong Shang Mawrie bam kwai ha duwar u Blei, ki long trai ia ka jaka kaba la tip kum lum Mawrie kaba kynthup ia ka madan iewrynghep bad ka hiar pateng sha ksiew, kong Philamon Mawrie.

U la ong ba ha u snem 1935, u Rev. Mon Lyngdoh bad ka kong Shang Mawrie kila ai sngewbha ia ka jaka ba shna ia ka iingmane Presbyterian bad kumjuh ia ka jaka ba tei ia ka skul Laitumkhrah Presbyterian Higher Secondary school, nalor ka jaka ba pynheh ia ka surok kaba dei bynta ka madan iewrynghep, ka sorkar ka la siew bailutksan sha ka kong Philamon Mawrie.

U la ong ba ka Laitumkhrah dorbar kam dei ka trai jong kane ka jaka bad baroh ki briew ki tip ia katei ka madan iewrynghep ba dei jong ka kur Mawrie. U la ong ba ka dorbar shnong Laitumkhrah ka la kyntait ia ka jinglong trai jong ka kong Philamon Mawrie bad ka jingpynlong ia ki tamasa bad kiwei ki prokram ka la pynsngewsih ia ka trai jaka khlem pan jingbit. U la ong ba ka Division Bench ka High Court ka la pynmih ia ka hukum kaba shah ia ka kong Philamon ban shna ia ka madan ban pynlong ka jingialehkai, bad teng teng ka trade fair. Kane ka jingleh ki nongpyniaid shnong ka Laitumkhrah ka la long ka jingpynkhein ia ka hukum ka kashari.