Shillong:Kum shi bynta na ka jingpynkhreh ïa ka jingpynlong ïa jingïaseng jong ka Balang Presbyterian ha Umpling, na ka liang jong u CEM ka KHADC uba long ruh kum u MDC jong ka thaiñ u la leit ban ïakynduh ïa ki nongïalam Balang ba kynthup naduh ki Tymmen Basan, ki Rangbah Balang nalor kiwei ki nongïalam ka Balang Presbyterian Umpling.
Ha kane ka jingïakynduh nalor ki nongkitkam ka Balang Presbyterian, la donlang ruh u Rangbah Shnong u Bah S Pyngrope bad secretary shnong Bah Lewis Jyrwa, ki Rangbah Dong bad kumjuh ruh Sdo PWD By pass Division, Sdo PHE Electrical Division.
Kane ka jingïakynduh ka long halor ka jingthmu jong ka jingpynlong ïa ka jingïaseng Synod Pdeng ka ban long ha u bnai Lber jong u snem 2024, bad kane ka jingpynkhreh ka la long kaba la khamjan bha ka por bad kane ka jingwan jurip ka long na ka bynta ka jingdonkam ban pynbha ïa ki surok, ki lynti syngkien, ka umbam umdih bad kiwei kiwei.
Haba kren sha ki lad pathai khubor na ka liang u CEM u Bah Pynïaid Sing Syiem u la ong, “Ki kam pynroi ha ka shnong Umpling kam dei dang shen hynrei naduh ba dang long ruh kum u MLA bad lah ïoh ban pynrung bun tylli ki skhim bad lah ïoh sanction ruh naduh u Naiwieng mynshem snem ba kynthup ïa ka skhim um ka JJM kaba lah jan kot sha ka T. 37 klur, nangta ka skhim surok kaba jan kot sha ka T. 6 klur kaba long na ka bynta ban pynïar bad pynkhlaiñ ïa kine ki surok ba mynta jong ka PWD Roads bad ki don ruh kiba dang thymmai kumjuh.”
U la ong ba u pynpaw ruh ïa ka jingkmen ban ïohi ba ki skhim surok ba la ïoh naduh ba u dang long u MLA mynta ki dang treikam bad ïohi ba ka jingmaramot surok ka dang ïaid shakhmat mynta kum ka jingpynïar ki surok, ki jingtei kynroh, ki Nala bad ha kane ka jingjurip la ïakren ruh halor ka jingai jingmut ne proposal ba dang thymmai kaba ïadei bad kane ka jingïaseng Synod kumba la sngewthuh ba na ka Estimate ba la dep ban leh ka la poi T. 2 klur 34 lak bad haba ïadei bad kane ym pat ïoh jingmang tyngka bad lyngba kane ka jingïakynduh la sngewthuh ba la hap ban pynsted ïa ka kam khnang ban ïoh noh ïa ka sanction kaba thymmai na ka bynta kane ka jingïaseng Synod.
“Ka long ka jingkyrkhu kaba khraw halor ka jingwan ka Synod, ka jingkyrkhu ha ka jinglong mynsiem bad kumjuh ruh ka jingkyrkhu ïa ka shnong ha ka roi ka san bad ka jingkyrkhu ha baroh ki liang, bad da ka jingïatreilang jong baroh yn lah ban pynurlong sted ïa kane ka jingdonkam ha ka por babiang,” ong u CEM ka KHADC.
Bha ba pdiang jingiaseng heh ban bha ki lynti syngkien, poi umbam umdih bad kiwei kiwei de ki jingmyntoi. Da lah dep te sa ia peit bad tip hi ym don shuh ba kit khlieh baroh is thet kti
kynmaw haba phi ai jingiarap ia ka jingiaseng synod kam mut ba phi lehbha (favour) eiei ruh em. ka dei ka kamram jong ka state towards religion in india. kaba sngewsih bad pynmong dohnud ka long ba ka npp ka iatreilang bad ka seng kaba pyrshah khristan.