Shillong:Myn ha ka sngi saitjain, ki ar tylli ki kynhun na ka jylla ki la mad ka jingshah rem, haba na ka liang ki shynrang ha ka Vinoo Mankad Trophy one day tournament ba lah ialeh ha Vijayawada, ki la shah rem noh ha ka Uttarakhand da 296 run, katba ha ka lympung Women’s U-19 One Day Trophy ba la ialeh ha Surat ki thei jong ka jylla ki la shah rem ha ka Tamil Nadu da 10 wicket.
Ka Uttarakhand kaba lah jop ia ka toss ka la kamai jem haduh 430/7 ha ki 50 over da ka jingioh ki ar tylli ki century kiba heh, kata u Aarav Mahajan 140 run bad u Poorvansh Dhruv 174 run. Lymda dei da ka jingioh ar tylli ki century na kitei ki nongtied ka liang ka pyrshah, ka Meghalaya kan jin da la lah ban lehbha ha ka kylla step ha kaba la iohi ba ka la lah ban weng shuwa 3 ngut ki wicket ha ka jingkamai kaba 92 run ha shuwa ba kitei ki radbah ka liang pyrshah kin ioh ban thlieh jem da 319 run na ka bynta u wicket uba saw ha ki 31.3 over.
Uba la kawang bol bha na ka Meghalaya u dei u Shavian Blah da kaba ioh ban shim 2/63 ha ki 10 over. Nalor jong u u Angkit Tamang u ioh 2/67, D Marak 1/66 bad u Cham Marbaniang 1/73.
Namar ka jingbuh thong kaba heh, ka Meghalaya ka la shem shitom shikatdei ban kot palat ia kata, hynrei ka la ialeh katlah katiai ban pyndep ia la ka bynta. Uba la tied bun u dei u Shubham Rasaily da 29 run. U Tamang u tied 18 run, Rituraj Rabha 17 run bad u Avinash Rai 13 run. Ka kynhun ka la ioh ban ialeh 47.4 over bad kamai tang 134 run da kaba liem lut baroh ki nongtied.
Mynta ka sngi ka kynhun kan ioh ban ialeh sa bad ka Hyderabad.
Haba phai pat sha ka lympung jong ki kynthei, ka kynhun Meghalaya kaba la hap ban tied shuwa, ka ioh ban kamai tang 44 run ha ki 26.3 over, ha kaba ka Tamil Nadu ka la lah ban tam ia katei ka thong tang ha ki 4.4 iover khlem da duh wicket satia. Kaba la tied bha ka na ka Meghalaya dei ka Janicka Marak da 21 run.
Ka jingialeh kaba bud bad kaba khatduh jong ka Meghalaya ha kane ka tournament kan long pyrshah ia ka Maharashtra mynta ka sngi.
Nalor kane ka lympung, sa kawei pat ka lympung jong ka Meghalaya kata ka, senior men’s Syed Mushtaq Ali Trophy T20 tournament kan ioh ban sdang mynta hi ka sngi ha kaba ka kynhun jong ka jylla kan ioh ban iakhun nyngkong shuwa bad ka Hyderabad kaba yn ialeh ha Jaipur.
Phi don ban ong eiei?