“Kaei ka Israel?”

AIS SUJA

Ka Israel ka ioh ia ka kyrteng na uwei u briew uba ka kyrteng jong u kham mynshwa u dei u Jakob.
U angel u ong ha u Jakob – yn ym khot shuh ia ka kyrteng jong me, u Jakob, hynrei u Israel: naba kum u Syiem ma la ioh bor bad u Blei bad ki briew, te me la jop ruh. Kata ka jia ha kawei ka jaka kaba ki khot ka Penial, kaba mut naba u Jakob (Israel) u la iohi ia u Blei hangta. Genesis 32: 28-30.

U Blei u la kyrkhu shikatdei eh ia u Jakob. U Blei u ong – Te yn ym khot kyrteng shuh u Jakob ia me, hynrei u Israel kan long ka kyrteng jong me: kumta u la khot kyrteng ia u, U ISRAEL.
U Blei u ong ruh ha u Israel – Nga long u Blei uba donbor baroh: to da nang kharoi, to da nang man bun ruh. Ka jaidbynriew bad ka jingialang ki jaidbynriew kin ia mih noh na me bad ki Syiem ruh kin mih na ka syngkai jong me. Bad ka ri ia kaba Nga la ai ha u Abraham bad ha u Isaak, ha me kein ngan ai ia ka bad ha u symbai jong me hadien jong me Ngan ai ia kata ka ri” Genesis 35:9-12.

Kumta kein ia kaba u Blei u la ai ka dei ka ri Israel kein bad ki dei ki jaidbynrew Jiw. Hooid hadien ki pateng kiba bun ba ka jaidbynriew Jiw ka la mane bleithaw ki la klet ia u Blei jong ki uba la wallam noh ia ki na ka jinglong mraw na ki Egypt kumba 430 snem. U Blei um lah ban klet ia kane ka jaidbynriew haduh kine ki sngi ba mynta. U Blei u la kular ha ka shibun ki jingkular wat lada kam pat tip ia u Jisu kum u Messiah jong ki haduh kine ki sngi ba kim lah ruh ban pdiang ia kata namar la tap matlah ia ki khmat ba kynja mynsiem jong ki. Hynrei ngi iohi ba u Blei u la nang iai pyndep ia ki kular jong u halor ka Israel. Wat lada ka pyrthei Arab ka ialeh ban pynduh jait ia ki, wat lada u Adolf Hitler u la mut ban pynduh jait syndon ruh um lah ha ki snem 1939-1945 AD.

Mynta ruh, ka pyrthei Arab lyngba ki Hamas ki Hesbolah ki pyrshang ban rat dyngkhong ia ki Israel, hynrei kim ym lah da lei lei. Balei? Namar ba ka ktien u Blei ka la kren. U Blei u ong – “Lada kine ki jingbuh rukom ki leit noh na khmat jong nga, ong u Trai, kumta u symbai Israel ruh un duh noh na ka ban long ka jaidbynriew hakhmat jong Nga ha la karta, kaba mut – katba ka sngi, u bnai bad ki khlur ki dang neh ha sahit bneng, ki Israel ruh kin ym lah ban jah na ka sla jong kane ka pyrthei. Jeremaiah 31: 35-36.

Balei? Namar ka Israel ka dei ban neh bad ban pyndep ia ki jingiathuhlypa baroh. Namar ka Israel ka ieng na ka bynta ka pyrthei baroh kawei (Israel stand for the world).
Ka Israel ka la nang ioh bor na ki rta sha ki rta (age to age) ka la nang roi ruh ha baroh ki liang. Ka daw ka long namar ba u Blei u la kren. Bad mynta ngi iohi ia ki jingshisha ba ki nang paw na ka por sha ka por. Bad kata ka long ba ka Israel ka long ka Atiar thma jong u Blei.
Ong u Blei – “Pha long u Sdie iapom bad ki atiar ialeh thma jong Nga, da Pha ngan pynlwet ia ki jaidbynriew, bad da Pha Ngan pynjot ia ki hima ……. Ngan pynlwet ia ki Nongsynshar bad ki deputies” Jeremaiah 51:20-23.
Mynta, ngi sngewthuh khyndiat hangne, kaei ka Israel?