Hiar ka die ka thied, ong ki nongshong dukan, naba kynriah jaka

Shillong:Hadien ba ka tnad Municipal jong ka sorkar jylla ka la mut ban pynpra noh ia ka jaka ieng kali taxi Jaiaw ka ba don ha Motphran ban shna pynieng thymmai noh ka ba jrong kumba 4 mala eiei, ki nongshongdie ja bad sha ha kane ka jaka ki la ong ba lada ka tnad jong ka Municipal kan sa pynpra noh, kumta na ka liang jong ki kan sa nangkham jynjar shuh shuh.Ki dukan kiba ju die sha bad ja ki don kumba 8 tylli eiei ha kane ka jaka.

Ha ka jingleit buddien, na ka liang jong u nongthoh khubor jong u Rupang mynta ka nohphai sngi ka 11 tarik u risaw 2023, ki trai jong kine ki dukan, ki la iathuh ba yn da ka tnad Municipal kan sa pynpra noh ia kane ka jaka bad ia ki dukan ba ki shong kin sa leit shong shipor ha jrong jong kane ka jaka ba la pynshna da ka tnad Municipal.

Ki trai dukan ja bad sha ki la ong ruh “Ngin sa mad jingeh shuh shuh bad ngin sa im jynjar namar ngi dei kiba la im ja nangne ban bsa bad pynbiang baroh ki jinglut ha iing ha sem lada ngin kynriah noh na kane ka jaka”.
Naduh ba kynriah ki nongñiah taxi ruh kiba ju ieng hangne man ka por ka iew ka hat ka la hiar bad kam ju long shuh kumba ju long, namar mynta ki la hap ban shet ka ja bad ka doh tang khyndiat eh, namar ka iew ka la sdang hiar, wat la katta ruh ki la kyrpad ia ka tnad Municipal ba hadien ba ki la dep ban pynpra noh kin sngewbha ban leh katba lah ban shna pyndep khamkloi, khnang ba kin ioh ban shong biang ha kajuh la jaka la bynrap ki trai dukan.

Shuh shuh ki la ong ba lada kynriah noh na kane la jaka ba ki ju shongdie, ka la ktah haduh katta katta, namar wat mynta ba hadien 1 bnai ba ki kali taxi ki la kynriah noh ka iew kam don shuh. Wat mynta ki shu ker tang da ka tin ruh ka la ktah haduh katne katne ban da leit kiew shatei sha jrong ka mut ba bun ki briew kim ia tip shuh, namar ka la kham pajih na surok bah Motphran.

Ka tnad municipal ka la bthah ia ki dukan die ja bad sha ba kin sa mih noh, ynda la dep shna ia ka jaka shong shipor hajrong haduh ban da dep pynthymmai ia kane ka jaka ba ki ju shong man ka por. Kumta na ka liang kiba shongdie ja baroh ki la pdiang ia kane katkum ka jingbthah ka tnad municipal namar ki kwah ruh ban pynthymmai ia kane ka jaka, khnang ba kan itynnad.