Kwah u Modi ban kyntiew ia ka roi ka san ki riewlum, ong u S. Bery

Shillong:U Vice chairman ka NITI AYOG u u S Bery ha ka jingleit jngoh ïa ka Ophis jong u Syiem ka Hima Mylliem ha ka janmied jong ka sngi Balang u la ïathuh ba u Myntri Rangbahduh ka ri u Narendra Modi u don ka jingthmu ban kyn tiew ïa ka roi ka san jong ki riewlum hapoh ka Ri India baroh kawei.

U la ïathuh ba ka jingwan jngoh jong u sha ka jylla Megha laya ka dei ruh hadien ka jingïa kynduh bad u Myntri Rangbah ka jylla u Conrad Sang ma ha Delhi ha ka 8 tarik u Ïaïong bad ban tip ruh shaphang ka jylla Meghalaya kaba don la ki rukom treikam la ka long ha ki kam shnong, kam synshar Hima bad kiwei.
U la ïathuh ruh ba ka jingthmu jong kane ka jingwan jong u ka long ban leit jngoh sha manla ki jylla kiba don sha kyndong kynshrot jong ka ri kiba donkam ïa ki lad Pynroi jong ka Sorkar Pdeng naba bun na ki jylla ba dei ki riewlum ki duh ïa ki lad Pynroi lyngba ki skhim ka Sorkar Pdeng.

“Manla ki kyndong kynshrot jong ki jylla hapoh ka ri ki ïapher kawei na kawei pat hynrei ngi ngeit pat ba ki jylla kidei ban kiew hajan baroh ki liang, kumta kane ka jingwan jngoh ka long ka lad ïa nga ban tip. Dei kane ka sorkar u Modi kaba kwah ban wanrah ki skhim sha baroh ki kyndong kynshrot ka ri India. Ka la don bun kaba la lah ban pyndep bad jop bad ka jingdon jong nga shane ka long ban peit ba ka NITI AYOG watla ka don ki skhim kiba duna, hynrei ka treikam na ka bynta ka jingïaid shaphrang ki jylla,” ong u Bery.

U la ïathuh ba u Myntri Rangbah duh ka ri u kwah bha leh bun ki kam na ka bynta ki riewlum kiba khlem ïoh ki jingkyrshan da ki skhim Sorkar Pdeng ne national scheme.
U la ïathuh ba ha ri baroh kawei ka jingdon ki riewlum ka la kot sha ka 200 million, kynthup ka NE bad Meghalaya.
Watla kane ka dang dei ka jingwan jngoh kaba nyngkong, hynrei u sngewkmen ban tip ïa ki rukom treikam ki Autonomous District Council kiba don la ka jong ka bor, nangta ki rukom synshar shnong ne Hima.

Na ka liang ka Hima Mylliem hadien ba la aiti ïa ka dorkhas, na ka liang u Paiem Ainam Manik Syiem u la pynpaw ïa ka jingsngew sarong ba ki heh ka Sorkar Pdeng kin wan jngoh ïa ka Ïing Dorbar bad na ka liang jong u ula ïathuh ba ka Hima Mylliem ka la don naduh ka snem 1853 bad dei tang ma ka kaba dang ïaineh haduh kine ki sngi kaba treikam ruh hapoh ka khyrnit kaba hynriew ka Riti synshar ka Ri India kaba lah ban kyntiew ïa ka jingïoh tang na ka khajna kaba mih napoh Ïewduh.
Nalor u CEM ka KHADC u Bah Pynïaid Sing Syiem, la donlang ki EM ba kynthup ïa u Bah Fantin Lakadong, Bah Alvin Sawkmie, nalor ki Myntri ka Hima Mylliem kiba la pynkupburom ruh ïa u Vice chairman ka NITI AYOG bad kiwei kiwei.