Shillong:U myntri ka tnad pule puthi ka jylla u Rakkam A Sangma, u la ong ba katkum ka jingkhein ne ka data kaba la pyllait ha ka website ka tnad pule puthi jong ka sorkar pdeng, ki don 168 tylli ki Lower primary skul bad 101 tylli ki Upper Primary skul ha jylla Meghalaya, kiba duna ia ka 10 ngut ka jingdon ki khynnah skul.
Haba kren sha ki lad pathai khubor mynta ka sngi, u Rakkam u la ong ba un sa wad bniah ia kane ka jingkhein kaba la pyllait ka tnad ka pule puthi ka sorkar pdeng, la ka long kaba shisha ne em.
Hynrei ha kajuh ka por, u la ong ba katkum kane ka jingkhein kaba la pyllait ka tnad pule puthi ka ri, ka long kaba sngew pang met bha lada kan long kaba shisha bad ka sorkar jylla kan sa thaw lad kumno ban pynbeit ia kane tangba um sngew dei ban khang ia ki skul.
“Ngi don 168 ki Lower Primary skul kiba don duna ia 10 ngut ki khynnah skul, katba ki Upper Primary skul ki don 101 katkum ka jingkhein ba la pyllait ka Ministry ka tnad pule puthi ka sorkar pdeng”, la ong u Rakkam.
U la ong ba ka liang ka sorkar kan wad bad pule bniah kumno kane ka jia, kaba lah ban dei namar bym biang ki jingdonkam ne kiwei ki daw. “Ka jingduna ki khynnah ban wan sha skul ka dei ka kam kaba sngew khia jur. Ngan pynshisha ngan wad ia kane ka jingtip namar ba kane ka dei na ka sorkar pdeng”, u la ong.
Bun hi ki ba duna khynnah skul ki dei ki skul ba duna ha bun ki liang.Khamam ki properties jong ki skul ka pynlong iaki khynnah ban mih sha ki skul private ne bala pyniaid da ki riew shimet
Ki skul ha Meghalaya ki don arshah ïa ki katto katne ki jylla ka Northeast.
Kane ka dei ka jingpynsyrwa ei ïa ka pisa paidbah. Kumta, dei ban shu khang noh ïa kita ki skul kiba shim tang ka tulop khlem nonghikai.