Sa ar tylli ki injekshon thymmai, yn sdang ka sorkar ia ki khynnah

Shillong, 14 Risaw:
Ka tnad jong ka Health and Family ha ryngkat ka jingiatreilang bad ka sorkar India kan pyntreikam sa ar tylli ki dawai injekshon thymmai ha kane ka jylla na bynta ki khynnah ban pynduna ia ka jingiap ki khynnah ha kane ka ri.
Haba kren mynta ka sngi Balang sha ki lad pathai khubor, ka Dr PD Chyne bad Dr M Roy ki la ong ba kine ki ar jait ki dawai injekshon ban pyllait naduh lashai ka sngi ka dei ka IPV (Inactivated Poliovirus Vaccine) bad ka Pentavalent. Kine ki dei ki prokram ba thymmai ba ka sorkar kan ai injekshon ia ki khynnah.
Ka Dr Chyne ka la ong ba ia une u dawai injekshon IPV yn ai tang ia ki khynnah bad yn ai ruh ka  Oral Polio Vaccine (OPV) drop.  Katba u dawai injekshon Penta valent yn ai ki khynnah ban iada na ki jingpang kum ka DPT (diphtheria, pertussis bad tetanus). Une un iada ruh na kiwei ki jingpang kum na ka  haemophilus influenza b (Hib), pneumonia bad meningitis.
U  dawai injekshon pentavalent un iada ia ki khynnah nalor kiwei pat ki jait jingpang jong ki khynnah  bad u pynduna ia ki khynnah ban ai ia ki injeshon shisien ba la ai da une u dawai injekshon.
“Ka jingdon jong une u dawai kan iarap shibun ia ki khynnah namar kan pynduna ia ki khynnah na ka jingai ia ki injekshon bad ruh kan iada na ka jingpang Hib”, la ong ka Dr Chyne.
Katkum ka jingong ka Dr Chyne, kine ki dawai kin iarap ban kyntiew ban pynioh ia ka met ba koit ba khiah ia ki khynnah ha kane ka jylla State ha kaba ka jingiap jong ki khynnah ka la kiew sha ka 47 percent ha ka ri.