![](https://www.urupang.com/wp-content/uploads/2023/10/image-27.png)
Shillong:Tang hadien katto katne sngi ba ka sorkar Meghalaya bad Assam ki la rai ban buh ki bor pahara ba long pdeng, na ka liang u Myntri ka sorkar jylla u Bah Paul Lyngdoh u la pynshai ba ïa ki Pulit CRPF, yn ym buh satia hapoh ki jaka ba don ki jingma ne kiba lah ban mih ki jinghuri hura.
Haba jubab ïa ka jingbuh jingkylli ki sengbhalang halor ka buh da ki CRPF ha ki katto katne ki jaka, na ka liang u Bah Paul u la ong ba ki don ki jaka ba ym lah ban shu ieh kumto khlem da buh ïa ki bor pahara.
“Kumba ka long haduh mynta, khlem pat don kano kano ka kaiphod kaba eh kaba mih na Langpih kaba lah ban pynmih ïa kano kano kaba lah ban jia jong ki jingkulmar ne huri hura jaitbynriew, kumta kum kine ki bor pahara yn buh tang ha ki jaka bajur ne kiba don jingma ha kaba ki jingeh ki lah ban mih ne ka lad ba lah ban mih ki jingkulmar jingkynad jaitbynriew,” ong u Bah Lyngdoh sha ki lad pathai khubor.
Haba kylli ba ki don ki seng kiba pyrshah ïa ka jingbuh ïa ki bor pahara ka sorkar Pdeng ha ki jaka haba kynnoh ba ka sorkar ka khlem sngewthuh ne shah ïalam bakla haba ïadei bad ki jingeh ba mad da kiba sah ha ki jaka khappud, u Bah Paul u la pynneh ban ong ba ïa kine ki jaka yn ym lah ban shu ieh khlem buh bor pahara naba kidei ki jaka ba don jingma.
“Lada ngi phah ïa ki pulit Meghalaya, ka Assam kan sa pyrshah, lada ka Assam ka phah ïa ki Assam police, ka Meghalaya kan sa pyrshah, lada ngi phah ki bor pahara ka sorkar Pdeng katto katne ki sengbhalang kin pyrshah, lada ngim phah ïano ïano ruh, phin sa pyrshah, te kumta ïano ngin phah? ngim lah ban ieh ïa ka thaiñ khlem don nongïada bad bor pahara,” lah ban jur u Bah Lyngdoh.
U la kam ruh kumjuh ba shisien ba la dep soi ïa ka MoU kaba khatduh hapdeng ki ar jylla, ka ïakajia pud kan sa long ka kam, bad ka burom kan leit sha kane ka sorkar ba mynta.
Phi don ban ong eiei?