Ka ain bam ar maloi kam ktah ia ki MDC, ong u Bah Pynshngain

Shillong, 12 Risaw:
U CEM ka KHADC u Bah Pynshngaiñ N Syiem u la kren skhem ba ka ain khang bam ar maloi ba pdiang ka sorkar ka Prevention of Disqualification (Members of the Legislative Assembly of Meghalaya) Act, 2015 kam nym ktah eiei ia ki MDC namar ba ki Autonomous District Councils (ADCs) kim dei ha ka sorkar jylla.
“Ngi sngewthuh ba ki ADC ki ioh ia ka bor thawain na ka Sixth Schedule,  kaba thaw da ka Parliament,”  la ong u Bah Pynshngain ha kane ka sngi Nyngkong.
U la ong ba kano kano ka jingpynkylla ia ka Sixth Scheduled dei ban leh da ka Parliament ym da ka sorkar jylla.
U Bah Pynshngain u la ong ba ka sorkar jylla kam don bor eiei ban thaw ain ia kano kano ka phang kaba hap ha kapoh ka bor jog ka  Parliament.
”Ngan iaid katkum ki kyndon jong ka riti synshar ka ri India kum u MDC” la ong u CEM ka KHADC.
U la ong ba katkum ka jingsngewthuh, ki  district council ki dei ba la pynkup bor da ka Sixth Schedule bad kim hap ha ka sorkar jylla.
Haba kdew ia ka Article 191 ka riti synshar ka ri, u Bah Pynshngain u la ong ba kane ka article ka la kdew shai ia u briew ban pynduh ia ka jinglong dkhot lada u long u dkhot ka  Legislative Assembly lane ka Legislative Council jong ka jylla lada u bat ark am hapoh ki tnad ka sorkar India kiba ioh jingmyntoi ne ha ki bynta ba la kdew ha ka First Schedule lane kiwei ki ophis ba la pynbna da ka iing thaw ain ka jylla.
” Ka Council ka dei kawei pat ka met bad ka jingkylli ba dei ka kam ba ioh jngmyntoi kum ka kam MDC kam shym la mih eiei”,u la ong.
U la ong ba lada u Lat ka jylla u rai ban pan jingmut na ka Election Commission katkum ka Article 192 ka riti synshar ka ri, um lah ban iaid lait ia ka  Article 191.
Kane ka article ka la ong ba shwa ban shim ia kano kano ka rai, u Lat u dei ban pan jingmut shwa na ka Election Commission.
U la ong ba kam don ka ain ka Parliament lane ka State legislature kaba treikam shadien.
”Ka jingtreikam jong kano kano ka ain ka dei ban long na ka bynta shakhmat, ym shadien”, la ong u Bah Pynshngain.
U CEM ka KHADC u la ong, “Haba nga thep kyrteng ban iakhun MDC ha u snem   2014, ka Entry IX ka Prevention of Disqualification (Members of the Legislative Assembly of Meghalaya) Act, 1973 ka shah ia nga ban long MDC bad MLA. Hynrei mynta kynsan kynsan, ka sorkar jylla ka kwah ban pynduh noh ia kane da kaba pyntreikam naduh ka 1 tarik Risaw. Nga pdiang ia kane ka jingleh ka sorkar ban thaw ia kane ka ain hynrei sngewsih ba ka la rai ban pyntreikam ia kane ka ain ha shiteng lynti ka bym iahap satia,”.