“Ngan pynwir ia phi sha lyndet ka Babilon”

AIS Suja

U Rangbah Lyngdoh ki Israel u kylli ha u Stephan – Hato kine kiei kiei ki long kumta shisha? U Stephan u iathuh shibun shaphang u Abraham mynba u don ha Mesopotamia, mynba ym pat leit sah sha Haran. U Stephan u la iathuh ba u Blei u la ong ha u Abraham – Ba u symbai jong u un leit shong ha ka ri nongwei (foreign lands). Hynrei katba ka ia jong kata ka jingkular ia kaba u Blei u la kular ha u Abraham ka la nangjan, kita ki briew (ki paid Jiw) ki la roi bad ki la man bun eh ha ei Egypt.

U Stephan u la iathuh shibun kiei kiei ia kiba u Blei u la kren u la kular bad ia kaba u Blei u la maham ia ki khun Israel. U iathuh ruh ia kaei kaba ki Nongiathuhlypa ki iakren ha ka Kitab jong ki Nongiathuhlypa, ia kaba u Blei u la kren kumne: “Shisha phi la ia knia ia mrad knia bad ki jingknia ha nga 40 snem ha kata ka ri khlaw (wildeness), ah phi ka iing Israel? Phi la iabah ia ita i iingmane jong u Molok bad ia u khlur jong u Blei Rephan, ki dur ia kiba phi la thaw ban mane ia ki. Te ngan pynwir noh ia phi sha lyndet ka Babilon”. Ki kam ki Apostol 7:1-43.

Shisha kane ka la jia kumta kumba u Blei u la kren lyngba ki Nongiathuhlypa jong u kum u Jeremaiah bad kiwei. U Blei u la kren lyngba u Jeremaiah – “Bad kane ka ri baroh kan long ka jingkynjah bad ka jinglyngngoh; bad kine ki jaidbynriew (Jiw) kin shakri ia u syiem Babilon 70 snem. Jeremaiah 25:11. U Blei u la kren ha u Jeremaiah ha u snem 605 B.C. ba ki Jiw kin shakri ia u Syiem Nebukhadnessar u Syiem ka Babilon 70 snem kein. Shisha ka la jia kumta.

U Stephan u iathuh ia kaei kaba ki Prophet ki ong ba yn pynwir ia ki Israel sha lyndet ka Babilon: Te ngan pynwir noh ia phi sha lyndet ka Babilon” ki kam ki Apostol 7:43. Ym tang ha Babilon hynrei shaduh lyndet ka Babilon ka mut shaduh lyndet ka Damascus hapoh Syria “Ngan ialam mraw iaphi sha lyndet Damascus” Amos 5:27. Kaba mut sha ki rud ki Shnat jong ka wah Babilon. Ki wah jong ka Babilon (Irag) ki kynthup ia ka wah Tigris, Euphratis. Ka wah Euphratis ka iaid lyngba ka Turkey, Syria bad Irag (Babilon). Kumta la pynwir ia ki khun Israel ym tang ha Babilon hynrei sha Syria bad Turkey ruh ha shilyter ka wah Tigris bad Euphratis.

Dei hangne ba ka Kitab Salm u Dabid ka iathuh shai ia ka jinglong mraw ki khun Israel: “Harud ki wah Babilon, hangta ngi shong, bad ngi ia iam haba ngi kynmaw ia ka Seion (ia ka Jerusalem).
Ha ki diengjamynrei hapdeng jong ki ngi ia sdien ia la ki duitara. Hangta kiba ia ring mraw ia ngi (ki nong Babilon) ki la pan ki jingrwai na ngi ki ong “To rwai ha ngi na ki jingrwai Seion”. Ki Israel ki ong – “Kumno ngin rwai ia ka jingrwai u Trai ha ri nongwei?” Salm 137:1-4.

Dei u Blei uba la pynwir ia ki khun Israel. Naduh myn nyngkong hi u la dep ong ha u Abraham “ba u symbai jong me un leit shong ha ka ri nongwei” ki kam ki Apostol 7:6. Balei? Dei namar ka jingeh ryndang bad jingbymkohnguh ia u Blei. Ki la ai jingknia ym ha u Blei hynrei ha ki ksuid 40 snem ha ri khlaw. Ki la mane bleithaw (idol worshippers). Ita i iingmane rit u Molok uta u khlur blei u blei Rephon, ki dur bleithaw bun jait ki iathaw ki iamane. Hynrei ki let noh ia u Blei jong ki, u Blei ki Israel kein ki kam ki Apostol 7:42-43. Dei haduh ki sngi jong u David bad u Solomon ba u Blei u la shem ka jingaiei ka jinghun na ka bynta ki khun Israel. Ki kam ki Apostol 7:46-47.
Haduh mynta, ki Israel ki dang pyneh ryndang. Tangba u Blei u la lum pat ia ki na ka jingpynwir na ka bynta ka burom jong U hi. Ong u Blei – Ngan lum ia kiba sah na ka kynhun jong nga. Na ki ri baroh sha kaba Nga la beh ia ki. Ngan wallam ia ki sha ka jingker jong ki (ki Israel). Kin sei soh bad kin nangbun” Jeremaiah 23:3.
Thik kumta, u Blei u khot mynta ruh ia kita kiba iaid wir ha kane ka pyrthei khlem u Blei. Ym tang ia ki Israel hynrei ia ki Jentil bad ia baroh ki jaidbynriew ki hima ka pyrthei ban ithuh bad pdiang ia u khun ba marwei jong u, u Jisu Khrist kein. U Blei um ju pynbor ia u briew, u ai ha ka mon laitluid (free will) ban jied ia u Blei ne ia u ksuid. U Blei um pynwir shuh kumba u pynwir ia ki khun Israel. Hynrei u shu ong – “Uta uba ngeit ha U, yn ym pynrem. Hynrei uta u bym ngeit u la rem lypa” Ioanis 3:18.