Naduh u 2010, khlem pynthymmai laisen ki dukan ha Keatinge Road

Shillong:Ki dkhot ka FKJGP Malki circle, mynhynnin ka sngi Baar ki la mih kynsan khrui ban leit hiar sha Keating road ban talasi ia ki kot ki sla jong ki dukan bar jylla, ha katei ka thaiñ, bad ha kane ka jingleit talasi, ki dkhot ka seng ki la khang dam noh ia kiba bun ki dukan ki bym biang ki kot ki sla kum ka Labour License bad kiwei.

Kiba bun kine ki dukan ki dei kiba die tiar kali bad shna kali bad na ka liang ki nongialam ka FKJGP, ki la bthah ia kine ki dukan bad ki nongtrei ba ki dei ban pynbiang ia ki kot ki sla, lym kumta, yn nym shah ban leh ia ki kam khaïi ha kane ka jylla.
Hadien ka katto katne por ba ki dkhot ka FKJGP Malki circle ki la leit ban khynra bad talasi ia ki kot ki sla jong ki dukan bar jylla ha ka thaiñ Keating Road, ki pulit ki la wan poi ha katei ka jaka bad ki la bthah ia ki dkhot ka seng ban sangeh ka jingkhang jubor ia ki dukan.

Ka jingpoi ki pulit ha katei ka jaka ka long hadien ba ki la ioh ia ka jingujor jong ka jingshah khynra bad shah khang bun tylli ki dukan. Na ka liang bor pulit ki la pyrshang ban pynsangeh ia katei ka jingkhynra da kaba ong ba kim shym la ioh bor bad khlem don ka jingpyntip wat ia ki bor shnong, hynrei na ka liang ki nongialam ka FKJGP ruh ki la pyni ia la ka jong ka nia bad iaid beit shakhmat ban khynra ia ki dukan kiba dang sah.

Kane ka jingkhynra jong ki dkhot ka FKJGP, ka long kaba kyndit bad la lap ruh ba bun ngut ki bar jylla kiba trei ha katei ka jaka kim biang satia ia ki kot ki sla ne ka labour licence, kaba la pynlong ia ki dkhot ka FKJGP ban khang noh ruh ia bun tylli ki dukan.
Ki nongialam ka FKJGP ki la iathuh ruh ba ha jingkhynra la lap ba ki don ki nongkhaïi kiba buh dukan ha katei ka jaka, hynrei kiba khlem pynthymmai shuh ia ki kot ki sla lane ki licence khaïi naduh u snem 2010.