Ki longkmie (ym ki kynthei), kin sa ioh shen, ia ka bhah, ba kyrpang jongki, kaba long 33 percent, ba kin mihkhmat ha iing dorbar jylla bad ha Lok Sabbha ruh kumjuh bad kane ka dei ka khep kaba kongsan bha, ia ka jinglong jingman jongki, namar ba na ka jingdon ba 3ngut ki MLA ha iing dorbar, kin sa kiew, sha ka 20ngut antad ha ka iing dorbar ha Meghalaya.
Kane ngi lah ban shim, ba kan dei ka aiom ksiar, na ka bynta jong ki longkmie jongngi, ba kin sdang ban shim bynta ha ka ki kam paidbah bad ba kan poi ka thong jongki, ba kin jop ha ki elekshon sha ka dorbar jylla bad sha Lok Sabha ruh kumjuh.
Halor kane ka bynta, ngin hap ban kren shai, ba ki shynrang lem bad ki kynthei hi, ki la ialeh kamkai ia kane ka kam kaba kyntang, da kaba ki jied MLA/MP/MDC, da ki heh spah, da ki bym nang ban thoh tang ia ka kyrteng lajong, ki bym ju kren ha iing dorbar bad kane ka la dei ka jing pynjah burom ia ki nongjied jong kano kano ka Constituency bad ka jingkitpop, halor katei ka mat, kam dei tang ia ki shynrang, hynrei ki kynthei ruh, ki don bynta bha, namar ba ki don ki Constituency, ba ki bun ki nong vote kynthei ruh, hynrei ki jied hi, ia kum kitei ki nongmihkhmat kiba anna.
Ka wan sa kawei ka bynta bad kata ka long, ba ka sorkar jylla, ka hap ban shai bha, ba ka jingailad ia ki longkmie, ka dei ban iai neh, ba kin dei ki trai shnong lane ki Scheduled Tribe bad ba kim bit ban shah da lei lei, ba ka North Shillong, ka South Shillong, ka Pynthorumkhrah bad kiwei, ba kin kylla sha ka General seat bad ban sa ai bhah ia ki kynthei dkhar, ba kin rung sha ka iing dorbar jylla.
Kaba kongsan, ka long ruh, ba ki kynthei, ki dei ban shim ia ka jingkitkhlieh, ba haba ki leit sha ka dorbar jylla, ki dei ban long ki khun khasi nylla bad ba kim dei ban long kiba la shah thied, ha u poiei shisngi, namar ba ki don bun ki kynthei, kiba la die ia la ka jong ka longrynieng, kiba la die, ia la ka jong ka iing ka sem, ka bri ka khyndew, ka spah ka phew, ha kitei ki bar jylla, kiba wan ia poikha bad ki, tang na ka bynta ban kamai spah ialade bad lada ki kynthei, kim don ia ka rai kaba skhem, kumta kin sa nang bun ki bar jylla, ki ban iapoikha ia ki kynthei Khasi, ki pynialeh elekshon, kin pynlong myntri sorkar ba kin ioh ban bamduh, ia ka spah jong ka Ri Khasi.
Don bun kiba pdiang bad bun kiba pyrshah, ia ka bhah ba 33 percent jong ki kynthei, khamtam ha Ri Khasi jongngi; hynrei, lyngba kitei ki jingjia, ki dei ban pynkyndit iangi, ba ngi dei ban pynskhem bha, ia ka ain bat khyndew jongngi, ia ka ain shongkha khleh, ia ki riti dustur, kiba ju bat bad pynneh baroh shi katta, namar ba kane kan khanglad, na ka jingshah thombor kaba kyrthep, ha ka buit sianti jong kiba nabar, nangne shakhmat.
nga kum ka kynthei kaba kit lyngkor palat ia u shynrang ban pyndap pynbiang ha iing ngam sngewiahap eiei ruh em ban mih khmat paidbah namar nga sngewthuh ngam kot bor kum Uta u rang khatarbor bad ka Kamram jong nga ka dei ban tei ia ka longing ia ki khun ki kti.