45 acre, ka jaka ia ki IAS, ka pynkhein ia ka ain bat khyndew, ong u bah Ardent

Shillong:U MLA ka liang Pyrshah na ka Voice of the People Party (VPP), u Bah Ardent Miller Basaiawmoit u la ong ba ka la don ka jingpynkheiñ ia ka aiñ khyndew, ka Megha laya Transfer of Land Regulation Act, 1972, kaba dei ka aiñ ba khang ia ki briew na bar Jylla ban thied jaka, ha kane ka Jylla, bad bynrap ka sorkar ka la pyntlot ia kane ka aiñ.

Haba wanrah ia ka resolution hapoh ka ïingdorbar mynta ka sngi Palei, u MLA na Nongkrem, u la pynpaw ka jingsngewkhia, namar ka jingshah pynkheiñ ka aiñ khyndew jong ka Jylla, bad u la ong ba ka rai jong ka Sorkar ban ai jaka haduh 45.01 akar ha New Shillong sha ki ophisar IAS ka dei ka jingpynkheiñ ia Meghalaya Transfer of Land Regulation Act, 1972.

U la ong ba ong ba ha ka 9 tarik u Nailar jong u snem 2007 ka Kynhun Myntri ka la shim rai ban ai jaka ia ki IAS ophisar ki bym dei na kane ka Jylla sha New Shillong Township, bad ha katei ka por u Myntri ka tnat Pynroi sor u la mynjur ban ai jaka haduh 45.01 akar sha ka Civil Service Officers Co-operative Housing Society da kaba siew tang T.19,60,636 kaba mut lada kheiñ ia ka dor ha ka shi square phut ka shongdor tang 1 tyngka.
U Bah Ardent u la ong shuh shuh ba dang shen ka la don ka jingpyrshang ban pynkheiñ biang ia ka Land Transfer Act, ha kaba ka la don ka jingtyrwa napdeng ki Myntri ka Sorkar Jylla ban shah ia ki doctor ba na shabar Jylla ban thied jaka ha Meghalaya ban dup lah ban pynbiang ia ka jingduna ki specialist doctor, bad bynrap ba kane kan long ka jingma bad ym dei satia da lei lei ruh ban shah.

U la ong ruh ba ki don shibun ki jaka bad khyndew kiba la ai sha kiwei ki tnat treikam ka Sorkar India, ba kynthup ia ka khyndew sha ka NEHU, NEIGRIHMS, ICAR, Airport, ki shipai, bad ki karkhana, bad na kane ka jingai ia ka khyndew ka Jylla ka khlem ioh jingmyntoi eiei, pynban kine ki jaka ki kylla long ki jaka ban pdiang ia ki bar Jylla ban bsuh khlieh sha Meghalaya.
U MLA ka Liang Pyrshah u la ther ruh ia ka jingdie jaka hapoh ka Raid Marwet ha Ribhoi District ba la donkti da u Syiem Raid, bad ong ba aiu ka Sorkar kan leh ia kane ka jingpynkheiñ ia ka aiñ.

Haba pynshai halor kane ka phang ba la wanrah da u bah Ardent, u Myntri ba khmih ia ka tnat Land Revenue, u Bah Kyrmen Shylla u la pule ia ki kyndon ka Meghalaya Transfer of Land Regulation Act, 1972, bad pynpaw ym dopn satia ka jingpynkheiñ ia ka aiñ.
Ha kane ka jingiatai u Myntri Rangbah ka Jylla ruh u la pynshai ba ka sorkar ka la bud ryntih ia ka aiñ ryngkat ka jingbud ia ki hukum jong ka ïingbishar, bad lada don kiba lap b aka don ka jingpynkheiñ ia ka aiñ ki lah ban mudui sha ïingbishar, bad bynrap ba ka Sorkar kan shim khia ruh ia ka mat ba la wanrah da u MLA ka Liang Pyrshah.

Na ka liang u Bah Ardent u bym hun ia ka jubab bad ka jingpynshai u la kyntait ban weng noh ia ka resolution, kaba la pynlong ia u Lamphang ban sngap noh ia ka sur kiba bun hapoh ka ïing, bad kiba bun ki pynpaw ba kim kyrshan ia kane ka Resolution.