Thmu ka MUDA ban pyniar pud tang  ban ioh pisa, ong u Bah SD Khongwir

Shillong, 11 Risaw:
U myntri sorkar barim ka jylla uba dei ruh u chairman ka Mawlai Down Dorbar u bah SD Khongwir u la ong ba ka jingthmu ka Meghalaya Urban Development Authority (MUDA) ban pyniar ia u pud u sam shabar ka Shillong Municipal Board (SMB) ka dei beit tang ban ioh pisa bun na ka sorkar pdeng.
U Bah Khongwir u la ong ba katkum ka Meghalaya Town and Country Planning 1973, ka kren shai ba ka ain kam dei ban ktah ia ki jaka ba hap hapoh ka jingpeit jong ki autonomous district council (ADC) ha ka jylla.
Ka aing ka ong, “Kan treikam ha baroh kawei ka jylla Meghalaya lait noh ki jaka jong ka District council. Ka lah ban treikam ha ki jaka ka district council tang lada ki district council ki ai ia ka jingmynjur”, la ong u Bah Khongwir.Katkum ka jingong u Bah Khongwir kane ka ain ka la kren shai hynrei ka MUDA ka iai thmu ban kyntur pud jubor da kaba pynkhein ia kane ka ain.
“Ka MUDA ka thmu ban pyniar pud tang ban ioh pisa bun na Delhi namar ba tang ki jaka jong ka Shillong Municipal Area ka dang rit palat bad ki lehrain ban pan pisa bun na ka sorkar pdeng”, la ong u Bah Khongwir.U la ong biang, “kumno ngin shaniah ia ka MUDA, peit tang ha ka khubor kaba la mih ba la bun sa tang ki kam jaboh suda”,.U la ong ba ka thain Mawlai kam treh ban pdiang ia ka MUDA da lei lei ruh bad lada ka leh jubor ki paidbah kin sa pyni da ki kam. “Ngin pyrshah beit ia ka MUDA”, la ong shuh shuh u Bah Khongwir.