Ka Lok Sabbha, ka la dep mynjur ia ka ain long nongmihkhmat, ki kynthei, kaba 33 percent bad kan dei ka ain, kaba kongsan bha, ia ki kynthei bad ia ka lawei jong ki jylla bad ka Ri India, hi baroh kawei.
Ha Ri Khasi, Jaintia jongngi, ngi duna nongmihkhmat kynthei bha bad ha kane ka dorbar kaba mynta, ki don tang, ka kong Ampareen Lyngdoh bad ka kong Santa Mary Shylla, hynrei lyngba katei ka ain, ka pyni, ba ki kynthei, ki dei ban poi sha ka 15, 16ngut ha iing dorbar jylla bad kumta ka mat, ka long, ba ki seng sain pyrthei, kin hap ban sei ia ki longkmie lane ia ki samla kynthei, ba kin wan shakhmat, ha katei ka kam shakri paidbah.
Ka sain pyrthei ha Ri Khasi, Jaintia, ka dei ka kam lalot, ka kam khaii, ka kam thap myntoi bad dei na kata ka daw, ba u lok, um ju pynshlur, ia la ka lok, ia la ki khun, ia la ki pyrsa, namar ba u shna pisa bad khie spah ialade, na ka jyrsih ba bun phew jait bad um kwah ban hikai ia la ki jong ki khun ki tnga, ba kin im, ha katei ka jait jingim jong ka thap myntoi shimet.
Na Garo hills, ngi iohi, ba U Mukul Sangma, ula hikai ia ka tnga bad ia ka khun kynthei jongu, ba kin wan, sha ka kam shakri paidbah; U Purno Sangma, ula hikai ia ki khun shynrang bad ka khun kynthei, ba kin wan sha ka kam politics; hynrei hangne, hangi, ym don uwei ruh u nongialam, uba btin lynti, ia la ki khun, ki tnga bad ki pyrsa, sha katei ka kam; hynrei ki ju pynduh mynsiem, ia la ki jong ki iing ki sem, ba kin rung ha ka sain pyrthei.
Mynta haba ka Parliament, ka la mynjur ia katei ka ain, kaba 33 percent, ia ki kynthei; kumta ki nong ialam sain pyrthei, ki seng sain pyrthei, ki dei ban sdang noh, naduh mynta hi, ban pynmih madan, ia ki kynthei, ha ka elekshon 2028 ne 2029.
Kam dei tang kata, mynta, haba ki la lah ban rung sha dorbar Jylla lane sha Lok Sabbha, kumta ka jingdawa ban don bynta ha ki dorbar shnong lane ha ki District Council, ka la dei ban kut noh, namar ba ka ain jong ka Parlia ment, kam ai bhah satia ia ki kynthei, ha ki dorbar District Council.
Ki kynthei/longkmie, ki dei ban hun ialade ban trei beit, ia kawei ka kam, na ka bynta kawei ka briew bad kata ka long, ba kin duriap bha, ba kin poi sha ka thong, ha ka dorbar jylla lane ba kin leit sha Parliament.
Ka don sa kawei ka mat, kaba kongsan bha bad kata ka long, ba katei ka ain ruh, kam neh sah hajuh; namar ba ha man kawei pa kawei ka khep, jong ka jingpynkylla Constituency, hangta ka bhah ki kynthei ruh, kan kylla bad dei namarkata, ba baroh ki kynthei ha ka jylla, ki dei ban pynkhih jingmut noh ialade, ia ka mynsiem trei politiks.
ki politician khasi jong ngi Kim juh hikai ia ki khun ki kti ne ia ka lok ,ne ki pyrsa ka long namar ba bun hi ki Shem ba ka dei tang ka Kam thok ,kam shukar ,ka kam iatuh ia thiem ,ka kam die ri die jaitbynriew , shisien ba la rung ha politics ki briew ba rung ki kylla long arsap lut ha ka dohnud ,bad jingpyrkhat ,ki kylla long khwan myntoi shimet lut baroh ki jingpyrkhat la kumno kumno 90%