Ka ju long ka jingleh, kaba sngewsih sat bad kata, ka long, ba tang shu la don kino kino ki jingleh thombor, ki jingleh bakla, ki jingshim kabu jongno re jongno bad haei re haei bad mar kumta hi, ka shait thaw khohreh, sa ka sorkar, da ki ain kiba eh tasam bad kitei ki ain, kim ju ktah ia kitei ki riew runar, hynrei, ki ktah ia u luk u lak, u bym tip eiei ruh em ia kitei ki kam bymman.
Ha ki khyndiat sngi ba ladep, ka longkmie, ka la duh ei, ia la i jong i khun, na ka jingshah khang lynti, haduh 3 kynta ha ka shnong Pamphyrnai bad halor katei ka jingjia, la iohi, ba ki bor District jong ka West bad ka South West Khasi hills, ki la leh, ia la ka jong ka bynta, ha kaba ki la tohkit mar mar, ia ka jingjia bad ki la khang, ia ka jingiakob khwai dohkha, khlem da ioh jingbit kaba biang, na ki bor District.
Hynrei ngi iohi, pynban, kumba katei ka kam, ka thew ban pyniap duh, ia baroh ki nongbuh pung dohkha, namar ba ka hukum, ka la mih pynstet, na U Lat ka jylla bad ka la poi syndon, sa ka jingiakren hapoh iing dorbar jylla.
Hangne, ka pynpyrkhat, ba balei ka sorkar Jylla, ka da kwah ban knieh noh ia ka bor jong ka District Council, sa tang ia i kam ban ai jingbit, ban ia khwai dohkha bad ka la dei ban thoh tang shilain, sha ka Council, ba kan da buh ia ki kyndon, kiba shai, haba ki don ki jingiakob khwai dohkha. U CEM, ka KHADC, um dei ban ailad, halor kane ka jingtuklar U Lat, namar ba kane kan dei ka jingiuhroit jong ka sorkar jylla, ia ki ain ka Council.
Ki don da ki hajar tylli ki pung dohkha, ha kylleng ka Ri Khasi Jaintia (bad dangshen, la iohi, ba wat ka myntri ka sorkar India ruh, ka ia muja lang, haba ka leit lap, ia ka jing iakob khwai dohkha ha Jaintia hills) bad kitei ki ia kamai kajih, na katei ka jingiakob khwai, da kaba ki pynlong ruh ia ka jingialeh khalai nusip, ha kitei ki pung bad katei kam dei satia, ka jingleh beain.
Lyngba katei ka jingjia, ka sorkar jylla, ka dei ban kren khohreh, ia ka District Council, ba kan pynbeit bad ki Rangbah Shnong/ ki Sirdar bad ki Syiem, ba kin buh, da ki kyndon, kiba shai, na bynta kitei ki jingiakob khwai dohkha nangne shakhmat.
Lada khein beain, ia kitei ki pung dohkha, kan mih ruh, ka jingkylli, ba balei ka sorkar jylla, ka bei pisa, ia kitei ki nongthaw pung, haba ka la iohi, ba ki don hajan surok bah ruh.
Khadduh eh, ka la dei ruh ia ka sorkar jylla, ba kan pynmih, da ka hukum kaba tyngeh, ba ki shakri sorkar, kim bit ban leit shim bynta, sha ki prokram paidbah, ha ki sngi longtrei; namar ba ki hap pyndep hok, ia la ka kam, kumba, u paidbah, ula siew ia ka tulop kaba biang, na bynta jongki.
Ngi don ka hok ban kamai da ka Fishing competition tangba ngim don hok ban pynthud pat ia ka lynti ne surok iaid paidbah kumba la jia ha Pamphyrnai. Kala dei hok ban shimti ka Sorkar ba kam don jingi jngai jong ki Council .