Uba duk te ula thiah iap ha iing, tang ki heh spah, ki poi hospital

Ka jingsumar, ka dei kaba uwei pa uwei u briew, u donkam, naduh i khyllung iba dang shu kha bad haduh ba u briew, un da khlad noh, na ka jingim shongbasa; hynrei ha kine ki sngi, ka lad jingsumar, ka la kiewdor jubor justi, kat haduh, ba uba duk, um don bor shuh, ban phohsniew, ia ka jingleit rung sha ki hospital, lada dei ban wad doktor lane ban shah sumar ialade bad dei tang uba heh spah heh phew, uba lah ban leit sha ki hospital.

Kito kiba leit shah sumar ha ki hospital bapher ha Shillong, ki ju iathuh, ba lada don shitaiew ha kitei ki aspatal, kumta ka jinglut, ka la poi lypa, da ki lak tyngka, lane kaba long kumba 20hajar antad, ha ka shisngi bad don kiba hap siew, da ki phewlak tyngka, na ka bynta, ka jingshah sumar, kaba da ki taiew lane shibnai duna antad.

Ki hospital sorkar, ki la pynduh jingshaniah palat ia ki paidbah, namar ba kim biang satia ka rukom sumar, naduh ki doktor, ki dawai, ki tiar ki tar bad ka jingsngew kitkhlieh jong kito kiba don ha katei ka kam bad kaba i diaw mynsiem, ka long, ba wat ki hospital mishon, kiba la ju shim, ba kin dei kiba kham pyrkhat ia u duk u suk, hynrei, kitei ruh kim pher satia, na ki hospital jong ki riew shimet bad ki tangon beit sngang, ia ka dor sha kito kiba leit shah sumar bad kam dei tang kata, mynta lei, ki nongpang, ki hap siew pisa lypa, shwa ban rung ha ki hospital, ha kaba wat tang ia kawei ka drip, ruh, ym don ba pyndait satia, lada phim don pisa ban thied.

Ngim tip, ia kaei ka daw, ba ka la jia kane ka jingkiewdor tasam; khamtam, naduh ka por corona, ha kaba ki hospital, ki khapngiah smam, na ka daw jong katei ka jingpang khyllah bad ka dei ruh, nangtei artad, ba ka dor, ka kiew beit hi soit, na bynta baroh jait ki jingshah sumar.
Ym tang katta, la iohi shuh shuh, ba ka jingdon sa ka skhim MHIS, kumba ka la ailad ia ki hospital, ba kin shim kabu, namar ba ki shim, ba ka jinglut, na ka bai sah hospital, kam dei satia ka pisa jong u nongpang, hynrei, ka dei ka pisa jong ka sorkar bad katei ruh (imat), ka dei ka daw bah jong ka jingshim kabu.

Ki jingpang, ha kine ki sngi, kim dei ruh, ki jingpang kiba rit, hynrei, haba wan ka jingpang bampong, ka jingpang khyllai, ka jingpang klongsnam bad kiwei ki jingpang khrew, ki dei kiba donkam, ban shah sumar, da ki snem bad kumta ki duk ki raitoi, ki hap thiah iap ha la iing.