Shong syier ka jingkieng wah Umtrew ha Lailad

Shillong, 11 Risaw:
Ka jingkieng Wah Umtrew ha Lailad ka Ri-Bhoi district ka la shong syier namar ka jingrim jongka. Ha ka jingshisha ka tnad PWD ka la dep ban maramot ia ka, bujli ia ki nar ba la sarang da kiba thymmai ban shan khnang ba kan long kaba bit ban iaid ban ieng ia ki kali.
U ophisar ka PWD Byrnihat ula ong ba katei ka jingkieng kaba jrong kumba 60 meter ka dang tlor, namar ba bun ki nar shan napoh bad na jrong ruh ki la sarang, kumta na ka liang ka ophis ka la mana ban iaid lyngba katei ka jingkieng ia ki kali kiba kit palat ia ka khyndai ton namar ioh ka twa ha kano kano ka por.
“Ngi la dep ban maramot la shi bnai ban bujli ia ki nar shan na jrong, hynrei kam pat skhem satia bad ngi hap ban maramot pat sa ki nar shan na shapoh kiba da sarang ba kan shkem”, ula ong bad bynrap ba katei ka jingkieng naduh ba sdang la shna ia ka tang na bynta ki kali kiba kit mar hapoh ka khyndai ton ka jingkhia kumta ka ophis ka maham tyngeh ba ym shah shuh ban iaid ia ki kali kiba kit palat ia ka khyndai ton.
Na ka liang ka PWD ka la dep pyntip ruh sha ki bor ba halor ka District, ioh don ki kali kiba iaid kaba lah ban wanrah ka jingma ia ki paidbah.
Kane ka jingkieng Wah Umtrew ha shnong Lailad ka long u budlum ba pyniasoh ia ka thain Ri Bhoi sepngi, ha kaba ki paidbah na ka thain ki hab ban leit ban wan man ka sngi ban pyndep ia ki kam ki jam jongki ha Nongpoh, ka nongbah jong ka District.