Sangpap kiba pli, ki trai shnong ka Raid Lyngkhat

Ka jingkren U Sordar ka Raid Lyngkhat, ha kawei ka youtube channel, ka la dei ban pynpangmet, ia ki riew ieid jait bynriew bad kata ka long, ba ka Bangladesh, ka la ioh kurup ei, ia ka madan Lyngkhat, kaba dei ka jaka ialehkai, ba pawnam bha jong ka thain Riwar Mihngi bad U Sordar, ula kren bynniaw bha, ba haba u leit ban maramot ia katei ka madan, hynrei, ula shah byrngem pynban ha ki shipai jong katei ka Ri ba marjan.

Hynrei kam dei tang katta, ka jingshisha, ka ieng, ba ka jingleh sting ki MLA/MDC, ki Sordar Raid, ki Rangbah Shnong bad khamtam ki trai jaka, ha ki khep, ba ladep, ka la pynlong ia ka sorkar India, ba kan bam jem, ia kitei ki jaka khappud ba kynthup ia ka shnong Lyngkhong, ha kaba katei ka shnong ruh, kan hap noh sha Bangladesh lem bad ka madan Lyngkhat.

Ka sorkar India, ka la bam duh, ia ki jaka kiba haduh 150 yard, da kaba ka pynbieit pisa, ia ka 10 yard antad, kaba don ka jingker sainar shiah, katba, ia katei ka jaka, kaba hap shabar jong ka jingker sainar, la shu ai hun mynsiem, ba kin kam trai, ki khar Bangladesh bad katei ka dei ka jingshisha, ka bym lah len satia; namar ba ki BSF ruh, kim ju pahara shuh sha shiliang u sainar, hynrei, ki wan tur noh sha khmat jong u sainar shiah.

Sangsot ia ki trai shnong, ba ki la shu duh ei, ia ka khyndew, kaba remdor haduh katta katta bad katei ka thain, ka paw shai, ba kam don nongmihkhmat kiba iohi, ia ka khia ka shon jong ki paidbah, hynrei, la shu ailad ba kan nion kput ka sorkar India, da ka jingiasylla bad ka Bangladesh.
Ka Lyngkhat, kam dei tang ka iew bad kam dei tang ka jaka, kaba don madan ialehkai, hynrei, ka don ruh ia ki nongshong shnong, kumba 20,30 iing, kumba long hi ka Lyngkhong bad lada kan wan ka jingker sainar shiah; ki 50 iing, kiba pli, kin ngat ha ka jingshah thombor, kaba shyrkhei bah, ha ki nongtuh bad ki nonglute, kiba na Bangladesh.

Sangsot, ia ka jingshimkhia bad sngew kitkhlieh jong U Sordar jong katei ka Raid, hynrei, un nym lah ban leh eiei dalade hi, namar ba U MLA/MDC lem bad ki bor Raid, bor shnong, ki la shah pyn thame, ha ka tyngka pliah jong ka sorkar India bad kumta ki jaka sha khappud ka Ri, ki la nangrit bad ka hima jong ka Bangladesh, ka la nang heh bad ka la nang iar, na ka por sha ka por.