Shillong:Ka Meghalaya Cricket Association’s U-19 Girls Inter District Cricket Tournament, ka la ioh ban pynkut noh ia katei ka lympung ialehkai myn ha ka sngi saitjain da ka jingiakhun ia ka final ha pdeng ka Shillong Cricket Association bad ka Ri-Bhoi District Cricket Association ha madan Um buda Nongpoh, ha kaba ka Shillong Cricket Association ka la ioh ia ka jingjop da ar run.
Ka SCA kaba la hap ban tied shuwa, ka la kamai 157/7 ha baroh ki 35 over. Hadien ka jinghap noh ki lai ngut ki nongtied kiba hakhmat jong ka SCA kata ka Anjana Sahani (15 run), Jayshree Singh (14 run) bad ka Chandni Kumari Sahani (18 run), ka Ri Bhoi ka la nang lah ban teh lakam noh ia ka rukom kamai jong ka SCA.Hynrei da ka jing ioh ban mih madan noh ka captain jong katei ka kyn hun ka Neelam Roy, ka la lah ban kyntiew ia ka jingkamai jong ka SCA ha kaba ka la lah ban tied 49 na ki 46 bol.
Ha katei ka jing ialeh ka la don ruh ka jinghap wicket da ka run-out, ha kaba ka Ankita Sharma ka la ioh ban weng 2/23 kum kawei na ki nongbol kaba hakhmat ha katei ka jingialeh.
Ha ka jingbeh thong, la iohi ba dei tang ka Ankita kaba la lah ban kamai marwei na ka bynta ka Ri Bhoi shaduh ki bynta bakut jong ka thong, ha kaba ka la tied 83 na ki 89 bol kaba kynthup ia shiphew tylli ki 4 bad ar tylli ki 6. Hynrei da ka jingioh ban pynhap noh ia katei ka nongtied tang 3.1 over shuwa ban kut ka jiniakhun, ka Ri Bhoi kam shym lah shuh ban khie-khlieh tad haduh ban duh noh ia katei ka jingiakhun
Ki nongkawang bol ka SCA kiba la ioh shim wicket ki long ka Neelam (2/17), Natasha Rabha (2/25) bad ka Jennyfer Fan con (2/28). Ha ka over kaba khatduh jong ka jingialeh, la iohi ba ka Ri Bhoi ka la donkam sa tang hynniew run ban ioh ia ka jingjop hynrei da ka jinghap noh ki arngut ki wicket ha ka bol jong ka Neelam, ka Ri Bhoi ka la shu sahkut noh pat tang ha ka jingkamai kaba 155/8.
Ha katei ka sngi pynkut, kiba la don lang ban sakhi ia katei ka jing iakhun ki dei ki nongialam jong ka MCA lem bad kiba mihkhmat na ki district association bapher ba pher, bad ia ka nam lah duh la ioh ban pyn kham ha ki nongialeh ka SCA da u President ka MCA u Naba Bhattachar jee, katba ia ka runner’s-up la ioh ban ai burom da u Vice-President bad kum u DCA President ka Ri Bhoi u Rayonald Kharkamni.
Phi don ban ong eiei?