Shillong:U nongialam ka liangpyrshah ha ka iing dorbar thawain u bah Ronnie u la ong ba ka Congress kam khein ia kano kano ka party, hynrei haba ki mat ki dei na bynta ka jingbit jingbiang bad kiba ktah ia u paidbah, ka kloi ban iashim bynta ban iathir.
“Ngim khein party haba iadei bad ki mat jong u paidbah wat la kim don ka jing ialong kum ka kynhun ka liangpyr shah”, la ong u bah Ronnie.
Kane ka jingong u bah Ronnie ka long halor ka jingkylli, ba ka Voice of the People Party (VPP), ka la kren shai ba kam kwah ban iathaw kynhun badno badno, hynrei kan shong marwei hapoh ka iing dorbar.
Ka liangpyrshah ka don lai tylli ki party ba kynthup ka Congress, ka TMC kiba don mar 5 ngut ki MLA bad ka VPP kaba don 4 ngut ki MLA.
U la ong ba naduh mynshwa ka VPP, ka la kren ba kam kwah ban iadon bynta ne thaw synrop kum ka liangpyrshah bad ka kwah ban iaid marwei.
U nongialam liangpyrshah u la ong ba ka Congress ka la pynkhreh ban leit rah ia ki mat kiba bun hapoh ka dorbar synrai kaba la sdang mynta ka sngi.
Haba kren mynta ka sngi, u bah Ronnie ula ong ba ka parti ka la pynkhreh ban rah iaki mat ba kynthup ia ki jingeh jong ki nongrep, ki nongri jingri, ka rep ka riang, nalor ka uniform civil code, ka koit ka khiah, ka new education policy nalor kiwei. Halor ka UCC u la ong ba ka BJP ha kine ki khyndai snem shiteng ka sngap hynrei mynta ba la jan ka elekshon kala wanrah ia kane ka mat bad kane ka paw shai kdar ba ka dei tang ka buit elekshon ia u paidbah.
Ki MLA ka liang pyrshah kiba mynta kim da sngew khia than na ka bynta ka jait bynriew Khasi, bad dei na kata ka daw ka VPP kam kwah ban ia synrop bad kum kita ki nongmih khmat.