Shillong:Ha ka jingiakhun final ong ka Meghalaya Cricket Association’s U-19 Girls Inter District Cricket Tournament, ka Shillong Cricket Association kan iakynduh pyrshah ia ka Ri Bhoi District Cricket Association kaba yn ialeh mynta ka sngi ha madan Umbuda, Nongpoh.
Ha ka jingiakhun ia ka semi final kaba ar hynnin ka sngi, ka SCA ka la lah ban pynliem ia ka Tura DCA da 129 run.
Ka Jennyfer Fancon jong ka SCA ka la ioh ban khur ia ka hat-trick kaba nyngkong jong ka hadien ba katei ka kynhun ka la lah ban pynkhyllem ia baroh ki nongtied ka Tura da tang 45 run na ka jigbuh thong kaba 175 run. Ia ka nam Player of the Match la ioh ban rah da ka Monica Singh kaba la tied 50 run bad dang iaineh.
Da kaba jop ia ka jingkynting pisa, ka Tura ka la jied ban ap bad kawang bol shuwa hynrei ka SCA ka la shim ia ka kabu ban tied bha ha katei ka kylla step da kaba kamai 174/6 ha ki 25 over. Ka Monica kaba la tied 50 na ki 55 bol ka la ioh ban thlieh san tylli ki 4 bad kawei ka 6, katba ka Jayshree Singh ka ioh 33 run. Kine ki shijur ki la lah ban ia kamai 51 run ha ki 5.3 over. Na ki nongkawang bol ka Tura, ka captain Awesa G Momin ka la ioh ban pynhap wicket da 2/15 ha ki 5 tylli ki over.
Ha ka kylla miet, ka jingialehkai ka la long ia ka Shillong Cricket Association ha kaba ki nongkawang bol jong ka ki la ther jem ia ka Tura da kaba ioh kamai tang 45 ha ki 15.1 over. Ka Pillika R Marak ka dei tang ma ka, ka nongtied ka Tura kaba la lah ban kham tied bha da 12 run bad dang iaineh na ki 16 bol.
Ka Fancon ka la ioh ban bol tang ar tylli ki over bad ka dei kaba khatduh-duh ia kaba ka SCA ka la ioh ban pyndonkam ha ka jinglekai hynnin ka sngi, hynrei ka jingioh mih mdan jong ka ka la long kaba sei soh ha kaba la iohi ha kawei na kitei ki over ka Fancon ka la ioh ban pynkhyllem 3 ngut ki nongtied ka liang pyrshah bad ioh ia ka poin kaba 3/10. Nalor jong ka ka Monica ka ioh 4/13 ha ki 4.1 over katba a Jayshree ka ioh 1/14.
Phi don ban ong eiei?