14tarik, buh sngi ka High Court, ia ka ain ar maloi

Shillong, 09 Risaw:
Ka Kashari Single Bench jong ka Megha laya High Court ka la phah ia ka mukotduma khang bam ar maloi sha ka Division Bench  ba kan ai ia ka jingbishar halor kane ka kam. U nongbishar TNK Singh u la pynmih ia ka hukum mynta ka sngi hadien ba la pynlong ia ka jingbishar bad u la buh sngi ban pynlong biang ia ka jingbishar ha ka 14 tarik Risaw.
Ha ka hukum jong u ba la pynmih, ka kashari ka la ong ba ka Prevention of Disqualification (Members of    Legislative Assembly of Meghalaya) Amendment Act, 2015, ka paw ba ki MLA ba mynta ba bat ark am kata kum u MLA bad MDC ha  Autonomous  District   kam ai shuh ka jingiada ia ki ban bat ar kam.  Hynrei kane ka jingkylli ka shong ha ki bor ba dei ban leh katkum ka Article 192 ka riti synshar ka ri India ban shim ia ka rai kata ka shong ha u Lat ka jylla  ba un shim ia ka rai ban pynduh ne ban pynneh ia ki MLA ba bam ar maloi kum ki MDC.
“Ngi don ha ka jingpyrkhat ba ia kane ka kam kaba donkam bha donkam ban shim bishar da ka kynhun nongbishar ne Full Bench”,  la ong ka hukum ka Kashari.
Lah ban kdew ba  ka president ka Civil Society of Women Organization (CSWO) ka Kong Agnes Kharshiing ka la ujor PIL ha ka High Court  ban dawa pynduh jinglong MLA/MDC jong kito kiba bam ar maloi.