Buh mawnongrim u MP ban tei ia ka Science bad Commerce ha RBPS

Nongpoh:Kum shi bynta ban nang pyniar shuh shuh ia ka shlem sain dur ia ki khynnah bad samla pule ka dong ka thain ka skul Ri Bhoi Presbyterian Higher Secondary School Nongpoh mynta ka kynti ka la pynkhreh ban pynkha sa ia ka Commerce bad Science Stream nalor ka Arts Stream kaba la don lypa.

Kane ka skul kadei ruh kawei naki skul kaba la rim bad la sdang nyngkong eh ban seng ia katei ka skul ha u snem 1967 kaba la lah ruh ban sei bad pynmih ia shibun ki riew shemphang bad khraw pyrkhat.
Kum shi bynta jong kane ka jingthmu ban ioh plie noh sa ia ka Commerce bad Science Stream na ka liang jong ki bor pyniaid ka Ri-Bhoi Presbyterian Higher Secondary School Nongpoh kila ioh ban buh bad ploe noh ia u mawngrim ha kaba la wan ban plie da u Ma Vincent H Pala MP ka Lok Sabha.

Ha kane ka sngi la iadon ryngkat lang ruh u Bah Mayral Born Syiem MLA ka Nongpoh, ka kong Paidolyne L Nonglait DSEO, Rev DS Roy Muktieh Executive Secretary I/C CED, RBP Synod, Rev HL Myrsing President ka Managing Committee, Rev KP Masharing Executive Secreatary ka RBP Synod, Bah W Radu Principal bad kiwei kiwei ki riew rangbah ryngkat ki kmie ki kpa, ki nonghikai lem bad ki khynnah pule jong katei ka skul.

Kat kum ka jingpynkhreh jong ka skul ka jinglut ban tei ïa katei ka ïing building ba thymmai ka long T.4, 64, 71000/- ba kum ki bor pynïaid skul kila pynpaw ruh ba ka dei ka jingkit kaba khia bad kyrpad ruh ïa kitei ki nongïalam naduh u Ma Vincent H Pala, Bah Mayral Born Syiem ba kin phai khmat lem ban pynmang skhim kum ka jingïarap ba katei ka jingthmu bad ka jingangnud kan urlong noh shen.