Ar snem duna, lai party

Albert Thyrniang

Ha u bnai November 2021 ryngkat bad u Mukul Sangma bad 10 ngut ki MLA Congress, u la phet na ka seng Congress bad rung sha ka All India Trinamool Congress (AITC). Ha u December 2022 u la mih na ka Trinamool bad la pynisoh bad ka BJP. Ha ka 13 tarik mynta u bnai pat u la riam da ki rong NPP. Kumta ha ki ar snem duna u la ioh lai tylli ki uniphom seng sain pyrthei! Une u dei u bah Himalaya Muktan Shangpliang.

Une MCS ophisar uba la shongthait u la joh jingmyntoi na ka jingiakajia hapdeng u Mukul bad u PN Syiem. U la ioh ia ka tiket Congress ban iakhun ha ka elekshon 2019 na Mawsynram konstituensi. U la job pyrshah ia u bah Syiem uba la dang shu seng ia ka People’ Democratic Front (PDF) ba la kylliap lama noh mynta. Lehse ka jingiadei bajan bad u Myntri Rangbah ba rim ka la iarap ia u bah Shampliang ban ioh lad ban ialeh na Congress bad ban poi sha ka thong.

Haba u Myntri Rangbah barim u la shah buh shadien ha ka seng Congress u bah Shampliang la shah ialam ia u Mukul sha ka AITC. Watla ki bym da sngewthuh politik ki tip ba kane ka jingphet na ka Congress ka la long ka ‘jingnohiap’. Baroh ki tip ba Trinamool kan nym jop ha Mawsynram. Hynrie u la sngap ia ki nongbud jong u kiba ong ba ka seng ka dei tang ka ‘phubol uniphom.’ Haba u la sngewthuh ia ka jingbakla u la lap ia u Prime Minister, u Narendra Modi kum u khraw klur da kaba iaroh ia u namar ki ‘kam pynroi’ jong u. Haba um don lad shuh da kum wei u la rung shisyndon sha ka ‘seng shit niam’ namar u pyrkhat ba kan pynjop ia u ha ka 2023 elekshon. U pynksan ba dei ki Rangbah Balang bad ki Tymmen Basan ki la kynthu ia u ban pyniasoh bad ka ka seng ba ‘pyrshah ia ki Khristan’.

U la leh bha hi. U la shah pyndem ha u kyrtong jong ka UDP tang da ki 955 but. Wat la katta ruh ym lah shuh ban rung sha ka Iing Dorbar Thawain. Kumta u la sdang ban pyniapher jingmut bad ki nongialam jong ka seng BJP. Shuwa ban mih noh u la kdew kti ia u heh duh u bah Ernest Mawrie da kaba kynnoh ba u khlem da leh ei ei ban pynkhlain ia ka BJP ha Meghalaya. U la kynnoh ruh ba u bah Mawrie u la bthah ia u MLA u AL Hek ban tar noh ia ka shiti kaba u la thoh sha u Myntri Rangbah ban ai kam ia u ‘nongthawain ba dang shu rem’. Ka Seng Kynthei jong ka BJP ka la ther pyrshah da kaba ong ba ka jingrung jong u bah Shampliang sha ka NPP ‘ka dei ka jingwat phlang ba kham jyrngam ka bym ju kut.’ Ki la iohi baka jinglong nongialam balyngkot jong u ha ka BJP ka khlem wanrah jong myntoi ei ei sha ka seng.
Ka daw jong ka jingpyniasoh had ka NPP ka dei ba u nongaiktien barim ka BJP u la shah thung kum Adviser ha ka tnat pule puthi. Da lade u la iathuh ba u Myntri Rangbah, u Conrad Sangma bad u Myntri Symbud u Prestone Tynsong ki la phun ia u ban tyrwa ban ai kam ia u. Lehse sa kawei ka daw ka long ba la kular ban pynlong kyrtong NPP ia u ha ka Lok Sabha elekshon ha u snem 2024. U la phaidien ia ka BJP namar ki nongialam ki khlem lah ban kular ban pynlong nongiakhun ban poi sha Delhi. Kumta haba ka NPP ka kular balei kyntait? Nalor katta u iohi shai ba ka kam don jongkyrmen na ka seng NPP ban na ka seng BJP kaba la shait shah kyntait ha paidbah na ka por sha ka por.

Ngi kylli ia u bah Shampliang, “Kaei ka aidiologi jong phi?” “Da ka basuk kumno phi lah ban kdup ia ki aidiologi bapher bapher hapdeng kyndiat por?” “Lane hato phim dong aidiologi ei ei?” Duna arsnem mynshuwa, kum briew Congress phi pyrshah iaka BJP bad ruh ia ka NPP namar ka ia trei lang bad ka nongshun ba nyngkong duh jong ka Congress. Hadein katto katne por pat phi la pynbna ba tang TMC ka lah ban ialeh pyrsha ia ka BJP. Sngewphylla hynrei ka dei kaba shisha, tang hapoh shisnem phi la rung sha ki ktem jong ka BJP hi. Mynta, hadien hynriew bnai phi la kylla NPP.
Kum kine ki jait kiba myllien ban kylla dur ngi dei ban kyntait mardor. Ki bym don aidologi ngi dei ban pikir bha. Ia kiba wat jingmyntoi shimet ym dei ban ai jaka ha ka sain hima sima. Ia kiba shim kabu dei ban pynrem. Ki nongthep but ki long kiba stad. Ha ka elekshon ba la dep, lait na ki ar lai ngut baroh kiba la kylliang seng ki la shah ai jinghikai.

Ka lah ban long ba une u nongshah khring NPP ba thymmai tam un sa ia aireng pyrshah ia ki paralok jong u mynshuwa, u Vincent Pala bad u George Lyngdoh ha ka MP eleckshon ka ban sa wan. Hato ngin ong ba ha ka sain pyrthei ngim dei ban sngew pylla ei ei? Kam pher wad lada kylliang seng laiphew sien ruh?
Ka sorkar ka la pan jingpynshai na ka khlieh nonghikai (principal) jong Jowai Government Girls School namar ba la tem ia ka jingrwai ‘Prah” ha ka sngi lehburom ia ki nonghikai ha ka 5 tarik. Ym dei ba ka sorkar ka sngewkhia ba ki skul kin kylla ki jaka iakhleh jaktung politik hynrei ka dei namar ba ka sorkar ka tieng ba ka VPP ka la nang paw nang paw. Ar taiew mynshuwa ka Kiang Nongbah College, kaba don ruh ha Jowai, ka la khot ia ki MLA VPP naka bynta ka ‘graduation day’. Kane ka dei ka jingthap ia ki ngap jong ka sorkar bad u MLA ka Jowai. Ka jingkyrit kam pat jah.
Ka prinsipal ka la ai ia ka jubab bad katkum ki tyllong khubor ka la pan map na ka sorkar. Lehse ha ki skul ym dei tang ia ki jingruwai elekshon dei ban tem hynrei iaka politik hi dei ban hikai. Ka aidiologi bad ka jingdonkam jong ka dei ban buh ha ki kot skul. Ki jingkylli kum: Ki seng sain pyrthei bapher bapher ki ieng halor kaei ka nongrim? Kaei ka soshal, ekonomik bad jingngeit niam jong kine ki seng? Ha ka jylla jong ngi, ‘Balei ka Congress ka don hangne? ‘Kaei ka aidiologi pdeng tam jong ka BJP?’ ‘Ka ei ka jingngei jong ka NPP?’ ‘Ka UDP bad kiwei kiwei ki seng riewlum de ki dong nongrim aiu?’Balei ha kane ka ‘Jylla u Lyoh’ ka shyrkhei bha ka jingphet seng? Kine bad kiwei kiwei ki jingkylli dei ban ia tainia ha ki skul bad khamtam ha ki colej. Kumta lehse ka jatibynriew jong ngi kan kam shem phang.

Ka NPP bad kiwei kiwei ki seng kiba don ha MDA-I bad II kim pyrwa ei haba ki khynnah skul ki ia shim bynta ha ki jingialang bad jingaid paidbah elekshon. Ym don seng ba la pynpaw ia ka jingsngewkhia haba ki khynnah samla ki ia rwai ia shad bad ia iaid hajrong kali ha ka jingbuaid. Une u nongthoh u la ioh jingtip ba tikna ba wat ia ki nongthep but ba nyngkong ruh la ai pisa bad kiad da ki kyrtong. Hato kane kam dei kaba kham sniew ban ia kaba tem jingrwai elekshon ha ki skul? Ki don ruh ki seng kiba pyndonkam ia khynnah colej ban sam pisa ha ki nongthep but. Hato kam long pop ha ki por elekshon? Balei ka sorkar ka kyndit haba la tem jingrwai seng ha ka por kmen ha skul hynrei kam sngew pher haba theh pisa ha ki por elekshon? Ki IAS bad MCS ophisar ruh ki trei kum ki nongpyniaid elekshon. Ki pan jingpynshai na ka prinsipal namar ki khynnah lui lui ki tem ia ka jingrwai seng hynrei ki khap ki khmat haba don ki jingleh bymdei ha ki por elekshon. Hato ngi hikai ki jonghikai babha tang ha skul, ha ki por elekshon pat ai lad ban leh katba mon? Ka politik ruh ka dei ka skul. Hato ha kane ka skul ym don akor ym don burom?

Ka NPP ka lah ban pynkhlain ialade hynrei kam don hok ban pynlut ksan ia ka pisa paidbah. Ka NPP kam patiaw ban ai jingai sngewbha iano iano lada ki rung sha ka seng. La ai Civil Sub-Division ia u Martin Dango ha Ranikor hynrei u hap ban bret noh ia ka Congress bad rung sha ka NPP. U Bajop Pynrope ua la pynrem ia u Myntri Rangbah ba u leit rwai ‘Summer of 69’ sha Europe ha ka por COVID. Hynrei phew se shen u la rung sha ka NPP namar u Conrad u ai kami ia u bad thung jongialam jong ka seng samla NPP. Lah ban dei ba ki MLA PDF ki la rung NPP namar ki ioh jingmyntoi. Lada hashuwa ka elekshon la kular ban ai 5 klur ki nongshongshnong ka jylla ki nang ban antat katno la ioh hadien ba ki la jop.

Ka MDA 2.0 ka pawnam ha ka jingai kam ia ki kyrtong ki ba la shah rem. U Hamlet Dohling, u PT Sawkmie, u HM Shangpliang bad kiwei kiwei ki la shah thung advisor, chairmen and co-chairmen. Ym dei tang ka NPP hynrei ki seng synrop ruh ki sei na ka pla pisa u paidbah ban siew tulop ia kine ki ;riew seng. Ka pisa ka lut da ki klur hynrei ki jongnoh synniang jong ki kim paw ei ei. U Chairman jong ka Meghalaya State Health Advisory Board, u Mayralborn Syiem u ong ba kitei haneng kin shah weng kam lada kim trei bha. Hynrei ngi tip kam long kumta. Kitei haneng bad kiwei ruh kin neh haduh ban da kut ka por jong kane ka sorkar. Ym don ba lada ki trei ne em. Ngi ki nongsiew khajna ngi hap ban ai tulop ia ki wad lada ki shu shong ruh.
Ki seng baroh ki kit pop. Ki pdiang iano iano ruh lada i iohi ba u ne ka lah ban wanrah ia ka jingjop. Kim peit u ne ka briew ka wan nangno. Ngam lah ban sngewthuh kumno ki briew jong ka Congress ki lah ban ruh BJP bad kumno ki dkhot BJP ki leit sha ka Congress. Kumno ki lah ban bret noh ia ka aidiology ba ki la bat baroh shi katta bad pdiang ia kawei pat ka aidiology ba iapher da ki 180 dikri? Ka mut beit ba kim kine kim don aidiology ei ei. Ka la jia ha Assam, ha Goa, ha Manipur bad ha ha Karnataka. Ha Madhya Pradesh ka dang iaid shait shait. Ki iohi ba ka Congress ka la ban wan biang sha ka bor. Kumta bun ki nongialam BJP ki la phet seng.Ngin sa nang iohi shuh shuh ruh katba ka Lok Sabha elekshon ka nang jan. U HM Shampliang bad ka NPP ki la ai nuksa lypa.
Sngewtynnad ban iohsngew ba ka VPP kan nym pynieng kyrtong ia kino kino kiba la ialeh lypa na kiwei ki seng. Kyrmen kin bat ia kane rai ban ai nuksa ba ka jingkylla seng katba mon kam long satia.