Ka jingleit jngoh jongngi sha khappud, kam dei ban wan rah jingiakynad, ong U Himanta

Shillong:U Myntri Rangbah ka Assam u Himanta Biswa Sarma u la ong ba ki ar ngut ki myntri rangbah kim kwah ban leit jngoh ia ki jaka ba iakajia pud, ka ban wanrah pat ia ka jingiakynad hadien ba la phet na jaka.

Mynhynnin ka sngi, u Himanta Biswa Sarma bad u Conrad K Sangma, ki la dihsha ha Secretariat bad ha kane ka jingiakynduh, ki la iakren artad halor ka jingiaid ki kam ba iadei bad ka jingpyn beit ia u pud u sam hapdeng kine ki ar tylli ki jylla.

Haba kren sha ki lad pathai khubor, u Himanta u la ong ba ka jingiakren ka long, tang ka jingiakynduh, namar ba u wan sha Shillong, hynrei kam pat dei ka jingiakren ba la pynbeit, bad kan sa don ka jingialang shen halor kane. U la ong ba ka jingiakren ka long ban tei shwa ia ka jingsngew shngain bad shaniah hapdeng ki paidbah kine ki ar tylli ki jylla khnang ba ka jingiapynbeit pud kan long da ka lynti kaba iasngew tynnad lang baroh ar liang.
“Ngi la iakren ia ki kam ki Regional Committee, ki don shibun ki jingtyllun jong ki kam ha kaba iadei bad ka jingpynbeit pud. Ki ar tylli ki sorkar kila mynjur ban buh ia ka Border Outpost ha Hahim, bad ngi la iakren ban tei ia ka jingshaniah na baroh ar liang”, la ong u Himanta.

U la ong ba ki ar ngut ki myntri rangbah kim kwah ban shu leit jngoh sha ki jaka ban dep rukom, ka ban wanrah pat ia ka jingiakynad hadien ba la mih na ka jaka bad ki paidbah kin kynnoh kylla ruh ia ki ba ki wan pynshit, hynrei shisien ba la leit jngoh, ki paidbah ki dei ban iashong suk kynjai da ka jingsngew tynnad bad pdiang sngewbha da ka jingphuh sam rkhie.

“Ngi kwah ban iakren iapynbeit shwa ha miej ban tei ia ka jingshaniah. Hadien, ngin sa leit ban jngoh ia ki khappud, namar ba ngi sngew ba ka jingleit jngoh jong ngi sha ki khappud, kam dei ban wanrah ia ka jingiakynad, namar haba ki ar ngut ki Myntri Rangbah ki leit jngoh bad hadien ba la kila leit phai, kan wanrah pynban ia ka jingiakynad bad ki paidbah kin sa kynnoh kylla ia ngi”, la ong u Himanta.
U la ong ba kine ki 6 tylli ki jaka ba iakajia ki kham jwat khyndiat bad shen yn sa pynbeit ha ka rukom kaba jai jai.

“Hadien ba ngi la tei ia ka jingshaniah, ngin sa leit jngoh sha ki jaka ba iakajia, ha kaba ki paidbah kin pdiang sngewbha da ki khmat phuh samrkhie, ha kaba kan don ki kam tamasa bad ki jingkmen”, la ong u Myntri Rangbah ka Assam.
Lah ban kdew ba ka jylla Meghalaya bad ka Assam, ki la pynbeit ia ki 6 tylli ki jaka ba iakajia pud ha ka kylla ba nyngkong bad mynta, ki la iaid ha ka kylla ba ar ban pynbeit ia u pud u sam.