Lah dep ïapynbeit bad ka Sorkar halor ki Toll gate, ong u CEM

Shillong:Haba ïadei bad ki khyrdop lum khajna kiba la leh palat na ka liang ka Council ka la dep ban pan jingpynshai ne ka Show Cause Notice bad ngim sa shim ïa ka rai hadien ba la ïoh ka jubab kaba shai na ki, bad ngan shu ïathuh lypa ba lada ngi lap ba ki la leh palat ïa ka rai ba la bthah da ka Council, ym banse ban hap phah khang noh syndon,” ong u CEM ka KHADC u Bah Pynïaid Sing Syiem haba kren sha ki lad pathai khubor.

U la ïathuh ruh ba ki toll jong ka Council, kim dei kiba dang shu plie dang shi taïew artaïew, hynrei kiba lah don da ki phew snem, hynrei na ka liang ka High Level Committee kaba la khlieh da u Myntri Rangbah ka jylla, ka la bthah ïa ka DCA ban ïa pynbeit bad ka KHADC bad katkum ki kyndon ka khyrnit kaba hynriew ka Council ka lah ban buh ïa ki toll gate hynrei ym dei ban buh ha ki jaka ba khim, ba pyndik ïa ka ïaid ka ïeng ki kali.

“Hynrei ki la don ki working plan ba la dep aiti sha ka Sorkar kiba dei ki jaka ba biang kiba don ki lay bye bad kiba lah ban khmih ïa ka Trading By Non tribal Regulations act naba bun bha ki kali nabar jylla kiba wan khaïi shane khlem ki kot ki sla ne wat ki ophis treikam jong ki hangne ha Shillong ne jylla Meghalaya na kata ngi buh ïa kine ki check gate ban khmih bad ban ym pynshlur ïa kiba nabar ban wan khaïi shane khlem kot khlem sla,” ong u CEM.
U la ïathuh ruh ba la don kumba 5 sngi ba ka la don ka jingkhñium ba la wanrah sha ka Council da ka kynhun ki nongñiah trok ba ka don ka jingleh thurmur jong ki katto katne ki agent kiba don ha ki Toll gate haba ïadei bad kane lah dep phah ka show cause notice lah San sngi shaki bad la aipor haduh 7 sngi ban jubab kumta ka Council kan ap haduh katei ka 7 sngi bad ka EC kan sa shim ïa ka rai.

“Lada kim jubab ngin phah khang noh lada lap ba ki ïaid shabar na ka jingbthah ka Council,” ong u CEM da kaba bynrap ruh ba kitei ki Toll gate ki dei ki jong ka Council, nabar la shna ïa ki katkum ki kyndon jong ka khyrnit kaba hynriew.
U la ïathuh ruh ba kitei ki Toll gate kidei kiba la ai wai sha ki kynhun shimet naba ka don ruh ka jingpynksan na ka High Court haba ïadei bad kane ka jingai wai, hynrei na ki 5 tylli kiba la aiwai lehse kin don kawei ne artylli kiba ïaid lait na ka jingbthah kumta lada lap ka EC kan sa shim ka rai ban phah khang.