Tyrwa ka kam bad pisa, ia kiba ha iing jong U bah Cherish

Shillong:Ka ïing bishar High Court jong ka jylla Meghalaya, ha ka 11 tarik u nailur 2023, ka la shim ban ujor biang ïa kawei ka mukot duma, ba la ujor hapoh Mawlai Police Station bad kata ka long ka Case no 44 dated 18.08.2021, kaba la ujor naduh ka 18 tarik jong u Nailar ka snem 2021.

Kane ka dei ka jingujor da u bah Granary S Thangkhiew, hapoh Mawlai police station, ha kaba iadei bad ka jingshah siat ïap jong u hynmen jong u, u bah Cheristerfield Thangkhiew.
Ha kane ka jingshim bishar, mynhynnin ka sngi, ki riew said, na ka liang jong ka sorkar, ki la pyntip ba ka jingtohkit ka dangïaid bad ki dang shu ïoh pdiang ruh ia ka FSL report bad ki la pan por ruh na ka ïing bishar ban nang ai por shuh shuh, ha kaba ïadei bad kane ka jingtohkit.

Na ka liang ki nongsaid aiñ bad na ka liang ki nong ujor ruh ki la shah ïa kane bad na ka liang ka ïingbishar, ka la buh por biang ban bishar ha ka 27 tarik jong une u bnai uba mynta.
Haba iadei bad ka jingslem jong ka jingtohkit, u bah GS Thangkhiew, u la pynpaw ba ka jingujor Ejahar ka dei naduh ar snem mynshwa bad ka jingaidaw jong ki ba ka dang iaid ka jingtohkit kam dei satia kumta, hynrei kane ka Mukotduma ka shu sahteng beit.
Haba iadei pat bad ka jingbishar ia kane ka mukotduma u la ïathuh ba shisien ba la poi shapoh ka ïingkashari, ki kyrmen beit ia kaba bha.
Na ka liang jong u bah GS Thangkiew, u la ïathuh ruh ba ki don ki jing pyrshang jong ka sorkar ban phah wengnoh ia u ia kane ka mukotduma, ha kaba ki la tyrwa ia kam bad ka pisa ha shwa ba kin rah ia kane ka mukotduma sha ka ïingbishar jong ka High court.

U la ïathuh shai ruh ba ka jingtyrwa ia ka kam bad ka pisa ka long ba lada shim ia ka pisa hap ban weng noh ia ka mukotduma.
Ka jingtyrwa ka wan na ki briew, ba la phah da u Chief Secretary jong ka jylla, ha kaba u para jong u bah (L) Cherishstarfield Thangkiew u la ioh ban iakren bad u Chief Secretary lyngba ka phone haba iadei bad kane ka bynta, hynrei u la pan, da ka jingthoh katba na ka liang jong u chief Secretary, u khlem treh satia ban ai ia ka jingthoh.