Shwa ban leit iakhun sha Nongbah Delhi, leh burom ka skul Saiden ia ki thei ialehkai

Nongpoh:Ki nongpyniaid jong ka Saiden Secondary School, Saiden Nongpoh, mynhynin ka sngi ki la leh burom bad ai khublei kitbok kitrwiang ia ki thei ialehkai phutbol jong katei ka skul, kiba la ioh ia ka lad ban mihkhmat na ka jylla sha ka Mukherjee Subroto Cup ka ban sa long ha Nongbah Delhi.

Haba leh burom ne ai khublei kitbok kitrwiang ia kitei ki thei ialehkai, la sakhi da ka jing don u Bah Donlang Soh khlet, Vice-Chairman ka MREGC, nangta u Bah Bobby L Nongbet, DSO Ri Bhoi, u samla Ferdynald, President KSU-NK HD, u Bah Markus Marten, President, HNYF Northern Region, Bah Sumarlang Swer u Coach, u Bah E.K Lapang, Rangbah Shnong lem bad kiwei.

Ki thei ialehkai ka Saiden Secondary School, kiba la mihkhmat na ka jylla, kin mih ha ka 16 tarik na jylla bad kiba la hap ha ka pool-B kaba kynthup lang ia Goa, Uttrakhand bad ka Kendriya Vidyalaya Sanga than, ka Meghalaya kan iakhun nyngkong ha ka 20 tarik pyrshah ia ka Goa.

Lyngba katei ka jingialang, ki nongkren ha katei ka sngi, ki la ai ka jingkyrkhu kyrdoh ha ryngkat ka kitbok kitwriang ia ki 16 ngut ki thei iakehkai, kiba sa mihkhmat na ka jylla lem bad ia ki arngut ki nongpeit nongkhmieh ia katei ka kynhun.