Pulom ka jingiakhun jong ka Ri Bhoi bad EKH CA na ka daw u slap

Shillong:Ka East Garo Hills District Cricket Association ka la ioh ia ka jingjop hynnin ka sngi pyrshah ia ka South Garo Hills DCA ha ka lympung Meghalaya Cricket Association’s U-19 Girls Inter District Cricket Tournament, hadien ba ka Senggamchi N Sangma ka la ioh ban weng hynriew ngut ki nongtied ka liang pyrshah.

Hynnin ka sngi, ka Senggamchi ka la ioh ban ialeh san tylli ki over bad ioh ban weng ia ki nongtied da 6/10, katba ka EGH ka dang ialeh ban iada ialade hadien ba ka la kamai duna ha ka kylla step da tang 51 run. Ha kane ka jingiakhun, wat lada, ka North Garo Hills ka la ioh ia ka jingjop, hynrei ka SGH ka la ioh lypa ban ieng ha ka kyrdan kaba hakhmat na ka zone 2 hadien ba ka la ioh ia ki jingjop ha ki ar tylli ki jinglehkai, katba ka EGH ka la rem ha ki ar tylli ki jinglehkai ba la dep.
Da kaba jop ia ka toss, ka EGH ka la jied ban tied shuwa hynrei ka la khyllem lut ki nongtied jong ka tang ha ka jingkamai kaba 51. Kaba la tied bun ka dei ka Kambesa A Sangma da 16 run, katba ka Rikmanchi M Sangma ka dei kaba la bol bha da 4/8. Nalor jong ka, ka Marme M Sangma ka ioh (3/17), Dianchidora N Sangma (2/13) bad ka Srijana Chetry (1/4).

Ha ka kylla miet la iohi ba ka SGH kam shym la don ba la lah ban kamai run da ka jingkawang bol jong ka Senggamchi ha kaba ka SGH ka shem jingeh shiktdei ban ialeh ia ki bol jong ka. Watla katta, ka Senggamchi ka la pyllait ei 10 tylli ki wide. Nalor jong ka kiba la ioh ban shim wicket ki long ka Kambesa (2/6) bad ka Silkamchi Marak ka ioh (2/13).
Ka jinglehkai na ka zone 1 Group A pat, ka Ri Bhoi DCA kaba la jop ia ka toss ka la jied ban ap bad kawang bol shuwa hynrei ka la ioh ban lehkai tang 16.3 over ha shuwa ba u slap un ther bad pynkut noh ia ka jingleh kai.
Ha kane ka jinglehkai ka East Khasi Hills CA ka la ioh ban kamai tang 54/3.

Ka jingiakhun semi final kaba nyngkong kan long lashai ka sngi Palei hapdeng ka Ri Bhoi bad ka South Garo Hills ka ban bud pat sa ka semi final kaba ar hapdeng ka Shil long Cricket Association kaba ieng hakhmat na ka zone 1 Group B pyrshah ia ka Tura DCA kaba ieng ba-ar na ka zone 2 ka ban ialeh ha ka sngi Thoh dieng.