Bym don tang ki ben skul, ban shong; pakhang lynti ki khynnah ia U Block Education Officer

Ki khynnah skul kynthei, ki la bitar lain bad kumta, ki la khang lynti, ia ka kali jong U Block Education Officer jong ka Vaishali District ha Bihar, U Ahilya Kumar. Ym tang katta, hynrei, ki la lynthem maw ruh, ia katei ka kali, kat haduh ba ki iit jong katei ka kali, ki la pait lut khait bad sa uwei u pulit, U Poonam Kumari, ula mynsaw ha katei ka jingjia.

Katei ka jingjia, ka la jia mynta ka sngi hat majai, ha kaba ki khynnah skul kynthei jong ka Girls High School ha ka shnong Mahnar jong ka Vaishali, ki la ujor pyrshah, halor ka jingbymbiang ka skul pule jongka, wat ha kaba tang ki ben bad ki jaka shong ruh, kim don satia, ha ki kamra klas.

U Neeraj Kumar, SDO Mahnar, u iathuh, ba ka jingbym don miej bad shuki ba kin shong ki khynnah skul, ka dei namar ba katei ka skul, ka la pynrung bun palat ki khynnah, na kaba ki dei ban don bad ka dei na katei ka daw, ba ki sa khang ia ka surok ban pynpaw pyrshah, ha khmat jong U Block Education Officer, ula ong shuh shuh.