Shillong:Ka jingpan jubab, kaba mih ha ka tarik 8tarik Nailur 2023, ba la ai da u Director of School Education and Literacy, Meghalaya ia ka Principal jong ka Goverment Girls’ Higher Secondary School, Jowai ka dei ka bym lah satia ban pdiang, kaba long kamkai, hynrei kaba buh jingsyier ruh ha kajuh ka por. Kane ka show cause notice ka long bym don nongrim bad kaba pynlehrain ïa ka rukom jingtreikam jong ki ophisar sorkar ha ka jylla.
Ha ka jingshisha ki ophisar rangbah la khmih lynti ba ki dei ki ban treikam da ka jingstad da kaba bud bud ryntih ia ka rukom treikam kaba shai bad kaba beit bha katkum ki ain ki kanun ban wanrah ia ka rukom treikam kaba bit ba biang. Hynrei kane ka show cause notice ka long khongpong. Kane ka notice ka mih lehse na ki ar tylli ki daw. Kaba nyngkong ka long ba une u ophisar ba pynmih ïa kane ka notice ka dei kaba u leh hi dalade da ka jingbymtip bha ïa ki kyndon treikam jong ka Meghalaya Services (Conduct) Rules, 2019, lane ka dei ka jingleh jong u ban pyni ïa ka jinglah treikam ryngkat ka jingkhmih lynti ban ïoh jingïaroh na ki heh jong ki Party ba synshar ïa ka jylla.
Ha kane ka notice la ïohi ba une u Ophisar um shym la kdew ia kano ka kyndon ba ka Principal, ka la pynkheiñ tad haduh ban da khot pynshai ne khot hajir ïa ka. Ha ka jingshisha ym ju don aiñ sorkar ban pynkitkhlieh ïa ki nonghikai ne ki shakri sorkar na ka bynta ka jingleh jong ki khynnah skul ne ki riew shimet kiba ym shah kynthup satia ha ka Rules jong u snem 2019. Ka daw kaba ar pat ka lah ban dei ba une u ophisar u ai ïa kane ka notice halor ka jingbthah jong kita kiba don ha ka shuki lane ki politician kiba don hapdeng ka jingsyier na ka daw ka jingkyrshan ki paidbah ia ka Voice of the People Party. Ka long ka bym lah ban len ba ki don bun ki politician ki la par niangkhriat bad suhjer namar ka jingai jingkyrshan ki paidbah ha kylleng kylleng ka jylla ia ka jingkhot jingwer ka seng VPP na ka bynta ban wanrah ia ka jingsynshar kaba khuid ba suba. Kiba kum kine, ki don ka jingthmu ban pyntieng pynsmiej ïa ki paidbah da kaba wad ki lad ki lynti ban khanglad ïa kane ka jingieit ki paidbah ïa ka Seng VPP.
Hynrei lada ka long kumno kumno ruh, kawei kaba shai kdar bad ka paw ka long ba ki don ki heh sorkar ha ka jylla kibym kotbor satia, ki bym sngewthuh bad ki bym don budlum ban leh ia kaba dei. “Ngin hap kylli ka lawei kaba kumno ka ap ia ka jylla, haba don ki ophisar sorkar kiba kum kine. Ka Seng ka dawa ba une u ophisar u dei ban weng noh shisyndon ïa kane ka show cause notice bad ha ka jingshisha u dei ban panmap khlem kano kano ka kyndon, ym tang na i Principal jong ka skul, hynrei na ki paidbah baroh, namar ba ka jingleh jong u ka long ban iuhroit iaka hok longbriew manbriew ki paidbah” ong ka kyrwoh na u Dr. Batskhem Myrboh, Nongaiktien, VPP.
yea yea yea