Shillong:Ka samla Stella Khongsni, ka la ioh ban phong ia ka pan sngiat kum ka Miss Meghalaya 2023 na pdeng ki 18 ngut ki thei dait riam, kiba iakhun ha kane ka lymgpung.
Ia kane ka lympung la pynlong ka Meghalaya Tourism Youth Development Society ha u Soso Tham Auditorium, Shillong ha ka 9 tarik Nailur 2023 lyngba ka jingkyrshan jong ki kynhun bapher bapher.
Ka samla Stella ka dang pule Bachelor of Science (B.Sc) ha ka sobjek jingkhein St. Mary’s College, Shillong. Ka shnong tynrai jongka, ka dei na Pynursla, tangba ka la sah sha Shillong wat la ka dang tbit bha ban kren war tiak tiak. Ka la jop ruh ia ka nam Miss Personality bad Miss Catwalk.
Ha ka jingiakop Miss Teen, na ki 18 ngut, la rah ka samla lud Angelina Jackson kaba 18 snem. Ka Angelina ka pule ha St. Mary’s Higher Secondary School, Shillong.
Ia ka nam baar la rah ka samla Sanijaijai Khyriem bad ka samla Lamiker Dkhar.
Kumjuh ha ka Miss Teen, ia ka nam baar la rah ka samla Denice Kharkongor bad ka samla Gracie Nandy
Ka Miss Meghalaya ka samla Stella Khongsni ka la rah T. 1 lak katba ka Miss Teen ka Angelina ka la khur T.?25 hajar.
Haba kren hadien ba ka la ioh phong ia ka pansngiat, ka samla Stella, ka la pynpaw ia ka jingsngew kyndeh bad ka burom ban ioh rah ia kane ka khusnam, kaba kam lah mutdur. “Mynshwa nga lehrain biej bha hynrei hadien ba la pyrshang, ka la nang wan ka jingsngew skhem ha nga”, la ong ka samla Stella.
Ka la bynrap, “Nga shaniah ha u Blei haba ka la wan shim ia kane ka sienjam”.
Kiwei pat kiba jop ha kiwei ki kyrdan jong ka Miss Meghalaya, ka samla Ibadonbok Shisha Marwein ka la rah ia ka Miss Talented, ka Dipa Ghime kum ka Miss Warrior Princess, bad ka Lavakeni Surong kum ka Miss Photogenic.
Ka samla Sanijaijai Khyriem ka la rah kum ka Miss Fusion Queen, ka samla Rida Maia kum ka Eco Queen bad ka samla Remika Dkhar kum ka Miss Congeniality.
Ha ka Miss Teen, ka samla Genelia Dkhar ka la rah ia ka nam Miss Catwalk, katba ka samla Palei M Chyne ka la rah ia ka nam Miss Talented. Ka samla Gracie Nandy ka la rah ia ka nam Miss Personality katba ka samla Denice Kharkongor kum ka Miss Photogenic.
Ki nongbishar ha kane ka sngi, ki long ka Kong Ilasara Kharkongor, u Charlee Lalthenmawia, u Ketholeno Kense Vehienuo, u S. Marwein bad u James Owen Farreira.
Kine kiba jop ha ka Miss Meghalaya 2023 bad Miss Teen 2023 kin mihkhmat ia ka jylla sha ka Beauty Pageants ha North East bad ka ri.
Phi don ban ong eiei?