Shillong:Uwei u samla ba sah hapdeng sor, ka Them Iewmawlong ne ka Punjabi Lane, u ieid bha ia ki mrad bad kane ka jingieid jongu, ka la pynlong ba un thied ia ki mrad kiba shah ka ain, ban ri hapoh ïing lajong jongu.
U Angad Singh uba dang pule klas XI, uba sah ha Them Iewmawlong ne Them metor, u la ri ia ki jait mrad kaba syriem kum ka dinosaur rit ne ka niangbsiah ne kaba la tip kum ka Iguana, kaba dang shi snem eiei. Ula thied khnang ia kane nabar bad katkum ka jingiakren, u Angad u la iathuh ba kane ka mrad, ka dei kaba shah ka ain ban ri ia ki briew, namar ba kam dei ka jait mrad kaba mih ha India, hynrei ka dei na Mexico, dewbah Africa.
Ym tang ia ka Iguana hynrei, u ri ruh ia ka Tham Shrieh ne ka Emperor scorpion bad u ai bam bha ia kine man ka sngi bad pynbiang ia ka jingshit jingkhriat katkum ka jingdonkam jongki. Kane ka tham shrieh ne ka Scorpion ka dei tynrai na dewbah Africa.
Haba kylli balei u ri mrad, u Angad u la iathuh ba ka dei ka jingieid jong u ia ki mrad naduh ba u dang khynnah bad u thied khnang ban ri ia ki hapoh ïing. U la iathuh ba ka Iguana ka dei kaba nyngkong ha dong mihngi ka India ba un ioh ban wanrah ia ka haduh Shillong.
Haba kylli, hato um tieng ban ri ia kine ki mrad, u la ong ba um don jingtieng namar ba u ieid palat ia ki mrad ruh ieid kim lei lei haba nang ban pyniadei paralok bad ki. “Nga ieid kham palat ia ki mrad teng teng ban ia ki briew, nga don ka jingieid ia ki mrad, ka dei ka jingsngew tynnad jong nga ban ri ia ki”, la ong u Angad.
U la don jingthmu ruh ban ri ia u bsein uba ju ri lem ki briew kaba la shah katkum ka ain.
Kane ka mrad Iguana ka lah ban san ka jingjrong haduh 6-7 phut bad ka lah ban im haduh 10 snem eiei katba ka Scorpion ka lah ban im haduh 3 snem eiei.
Hapoh ïing u sin ia kane ka mrad Iguana kum ka Lucifer katba ia ka Scorpion u ai kyrteng kum ka Alexa.
U briew uba bha u ieid ia baroh ki jingpynlong U Blei, kyrmen une u samla un long ka nuksa ia kiwei pat ki para jait bynriew jong u.