Katba ka seng BJP, ka dang thawlad ban pynkylla kyrteng ia ka India, sha ka Bharat; hynrei ka sorkar Karnataka, kan pynmih hukum noh shen, ha ki khyndiat sngi, ki ban wan, kaba bthah, ba baroh ki nongtrei Bank, kiba don ha katei ka jylla, ki dei ban kren, da ka ktien Kannada bad ba kin iakren ruh ia ki nongleit donkam, ha ki Bank, da katei ka ktien shnong jong katei ka jylla.
Katei ka dei ka thong jong ka sorkar Congress, ha ka jylla Karnataka, ban pynurlong ia ka ktien Kannada, kum ka ktien, ban iakren paidbah. La iathuh ruh, ba kiba bun ki nongshong shnong jong katei ka jylla, ki shem jingeh shikatdei, ban iakren bad ki nongtrei bank, namar ba kim sngewthuh ia ka ktien Kannada.
Ha ka jingiakren bad ka kotkhubor, Economic Times, U Santhosh Hangal, Secretary ka Kannada Development Authority (KDA), u iathuh, ba ka sorkar jylla, kan sa pynmih noh shen, ia ka hukum, halor katei ka kyndon ban kren da ka Kannada.
Ka ain ba la la mynjur, da ka sorkar Karnataka, The Kannada Language Comprehensive Development Bill, 2022, ka kren shai, ba uno uno u briew, uba wad kam ha ka jylla Karnataka, lane uba trei ha kino kino ki tnat lada dei ki jong ka sorkar jylla lane kiwei pat ki tnat bym dei jong ka sorkar jylla, u dei ban nang ban kren ia ka ktien Kannada bad la bthah ruh, ba kino kino ki Bank, kiba don palat 100ngut ki nongtrei, ki dei ban plie ia ka Kannada Cell, ha kaba yn khlieh da u ophisar rangbah, uba tip, ia ka ktien Kannada, ban pynbiang ia ka jingdonkam jong ki trai shnong ha katei ka jylla.
kine kein kidei kita ki nongmihkhmat bashisha. Ha meghalaya ruh dei ban leh kumta ba kino2 kiba iohkam hangne ki dei ban kren bt da ka ktien khasi bad garo. Kan pynmyntoi shibun eh ia ki samla jongngi lada leh kumta.