“Yn pynkiew 5 percent ia ka bhah thungkam kiba duna dkhot met”

Shillong, 08 Risaw:
U Myntri khyn nah ba peit ia ka tnad Social Justice and Empowerment (SJ&E) u Krishan Pal Gurjar u la ong ba ka sorkar NDA kan wanrah noh da ka ain ba thymmai hapoh ka iing dorbar ka jylla ban pynkiew ia ka bhah thungkam na kaba mynta 3 percent sha ka 5 percent ia ki briew ba don jingduna dkhot met.
“Ngin wanrah noh ia ka ain thymmei ha ka dorbar ka parliament ka ban long shen ban pynkiew ia ka bhah thungkam ha ki tnad sorkar ia ki briew ba duna dkhot na 3 per cent sha ka 5 per cent” la ong u Gurjar haba kren sha ki nongthoh khubor mynta ka sngi ha ka nongbah Shillong.
U Gurjar u la ong ba kin pan ruh ia ka kaiphod na ka sorkar Meghalaya ka bym shym la pyntrei kam pura ia ka polisi thungkam ia ki briew ba duna dkhot met.“ngin pan jingshai na ka sorkar jylla halor ka jingbym lah ban
pyntreikam pura ia ka bhah thungkam ia ki briew ba duna dkhot met ha kane ka jylla”, la ong u Gurjar.
Katkum ka jinglap RTI ka Khasi Disabilities Association (KDA), na ki 32 hajar ngut kiba duna dkhot met, kiba ioh kam sorkar ki don tang kumba 15 ngut naduh ba la pyntreikam ia ka ain Persons Withb Disabilities (PWD) Act ha u snem 1995.
Ha kane ka ain,la bhah thungkam ia ki briew ba duna dkhot met 3per cent hynrei na ka liang jong ki sorkar jylla kim shym la lah ban leh ia kane.
U Gurjar u la ong ba ka sorkar jylla ka dei ban thaw ia ka tnad ba kyrpang ia ki briew ba duna dkhot met. “Ka sorkar jylla ka dei ban thaw ia ka tnad kaba kyrpang ia ki briew ba duna dkhot met khnang ban pyntreikam hok ia ki skhim bad ki jingiarap ba dei ban ai sha ki”, u la ong. U la ong ia kane haba kren hynne ka sngi ha ka jingialang sam ia ki tiar, ki kot pule sha ki briew ba duna dkhot met kaba la pynlong ha Bethany Society.U Gurjar u la ong ba ki don 2. 68 klur ki briew ba don jingduna dkhot met ha ka ri katkum ka khansumari 2011 hynrei tang 49 per cent ki la ioh ia ki syrnot duna dkhot met ne disability certificate (DC). U la kyntu ia ka sorkar ban pynlong ia ka jingleit wad ia ki briew ba don jingduna khnang ba baroh kin ioh ia ka DC bad kin ioh ia ka jingmyntoi na ka sorkar.
U la bynrap ruh ba ka sorkar ka la ai T. 285 klur ban pynthymmai ia ka Manufacturing Corporation of India, Nagpur ba kan pynbiang ia ki tiar kiba donkam ia ki briew ba duna dkhot.
Ha kane ka sngi u myntri ka sorkar pdeng u la sam ruh ia kitiar sha ki khynnah ba duna dkhot met, bad ki kot pule sha ki 10 tylli ki seng ba seng ia ki skul ia ki khynnah ba duna dkhot met.