Hadien 36 sngi ba ki phet rieh, kem noh ki pulit ïa ki nongïalam ka ACHIK

Shillong:Arngut napdeng ki lai ngut ki Nongïalam ka ACHIK, kiba shah thwet halor ka jinghiar thma ïa ka Chief Minister Office (CMO) ha Tura hapdeng ka jingïalang jong u Myntri Rangbah u Conrad K Sangma, kila shah kem noh na ka thaiñ Samanda, East Garo Hills.

U Nongïalam ka ACHIK bad Garoland State Movement Committee u Balkarin Ch Marak, la lap ba ula riehtngen ha ka shnong Bansamgre kaba don ha surok rim na Tura sha Williamnagar. Ïa une u Nongïalam la kem ha ka jingkhynra ba la pynlong da ki Pulit ka West Garo Hills bad ka East Garo Hills.
Ïa une u Nongïalam ka ACHIK la ïalam tian bishar sha ka Ïingkashari kaba ai bor ïa ki Pulit ban set 2 sngi ha ka Police custody.

Kane ka jingkem ka la wan jia hadien 39 sngi, kata hadien ka jingshah kem u Nongïalam ka ACHIK u Labenn Ch Marak myn ha ka 17 tarik Nailar. U Labenn u dei u DySP barim bad u Civil Service Officer ka Sorkar Jylla.
Tang ka General Secretary ka ACHIK bad nongïasaid Aiñ ka Bernita R Marak ka dang phetrieh napdeng ki 3 ngut ki nongïalam ba shah thwet.

Ïa baroh lai ngut la pynngat ha ki kyndon kiba tyngeh jong ka Unlawful Activities Prevention Act ka bym lah ban bah jamin, kaba ailad ïa ki Pulit ban pyndep ïa ka jingtohkit.
Dang shen, kine ki laingut kila pyrshang ban ïaid kiar na ka jingkem ki Pulit da kaba leit pan bah jamin lypa na ka Ïingkashari Meghalaya High Court hynrei ka Ïingkashari ka la kyntait, namar kane, kine ki lai ngut kila phetrieh.